Goierriko Hitza

Larunbat gauean izendatu zuten Uxue Alberdi bertsolari elgoibartarra Osinalde bertso sariketako irabazle. 37. aldiz jokatu zen Osinalde elkartean, bertsolari gazteentzako bideratutako txapelketa. Alberdik, iazko arantza kendu ahal izan du aurten; iaz finalera sailkatuta zegoen arren, ezin izan zuelako saiora joan azken orduko batengatik. Julio Sotok jaso zuen kartzelako sailean lan onena egin izanaren saria, eta Alaia Martinek bertsorik onenarena, "giltza" hitzari botatako aleagatik.

Gabiriako Osinalde elkartea bertsolaritzaren bilgune bero izan zen larunbat gauean. Bertsozaleek ez zuten hutsik egin; 110 afaltiar bildu ziren, eta txartelak agortuta, 30 inguruk herriko beste jatetxeetan geratu behar izan zuten. Afal ondoren, ordea, entzule guztiak sei bertsolari gazteren lana entzuteko elkartu ziren.

Julio Soto (Gorriti), Unai Gaztelumendi (Añorga) –biak Aztiri sariketan sailkatuak–, Oier Aizpurua (Zarautz), Alaia Martin (Oiartzun) Ordiziako Argi Berrin–, eta Maialen Velarde (Zumaia), Uxue Alberdi (Elgoibar) –Idiazabalgo Axaritik– ziren kantari.

Uxue Alberdik gogotsu ekin zion bertso saioari. Jokin Murua zen aurkezle eta gai-jartzaile. Gaueko bitxikeria elkarteko argia joan zenean etorri zen. Gaztelumendik ilunpean bota zituen bi bertso, egoera gaiarekin egoki lotuz. "Parrandatik etxera itzuli eta zure hean bi neska aurkitu dituzu", jarri zion lanerako gaia Muruak Gaztelumendiri. "ekinean Gabiriako bonbilla guztiak funditu" zituztela erantzun zuen añorgarrak.

Argia itzuli, eta argitsu bukatu zen 37. Osinalde bertso sariketa. Kartzelako ariketan, entzuleek Julio Soto aukeratu zuten ondoen aritua. Bestetik, bertso onena Alaia Martinek bota zuen.