Goierriko Hitza

Espainiako Auzitegi Nazionalean, ANV eta EHAKren kontra egiten ari diren epaiketan, lekuko moduan deklaratu dute gaur Itsasondo eta Legorretako alkateek. Fiskaltzak, AHTren kontra bi udal hauek agertu duten jarreraz galdetu dienean, proiektu honen kontrako jarrera «herri borondatean» oinarritzen dela adierazi dute. Hala, ukatu egin dute gai honen inguruan ETAren agindurik jaso dutenik. Fiskaltzaren arabera, AHTren kontrako kanpaina, «proiektuaren kontrako posizionamendu legitimotik, ETAk eta Batasunak bultzatutako mehatxu eta intimidazio jarreretara pasatu da». Hau guztia ukatu egin dute EAE-ANVko ordezkariek.

Iñaki Oiarbide Legorretako alkateak, «kezka» agertu du «tamaina honetako obra bategatik», eta proiektuaren kontrako jarrera berretsi du. Estatuaren abokatuak, Oiarbidek egindako adierazpen batzuk gogorarazi ditu. Bertan, «AHTa eta inposaketa gelditzeko ahal dugun guztia» egingo zutela zioen. Esaldiak, gazteleraz euskaraz baino zentzu gogorragoa duela esan eta hitz horiek «herriak pentsatzen duena» islatzen dutela azaldu du Oiarbidek.
Legorretakoaren ondoren, Xabier Iturriotz Itsasondoko alkateak ere deklaratu du Auzitegi Nazionalean. Bera ez dela ANVko militantea azaldu du, baina bere «karrera politikoan, Euskal Herritarrok eta EHAK» alderdietan aritu dela argitu du. «Itsasondo herri txikia da, eta lagun baten bitartez» sartu zela zerrendan esan du Iturriotzek.
Lekukotzen tartea bukatzeko, Tren Sozialaren Sarea plataformako hiru kidek ere deklaratu dute; EHNEko Helen Groome, ELA sindikatuko Julene Gabiola eta Aralar alderdiko Jon Andoni del Amo. Hirurek esan dutenez, ANV sare honetako parte da, eta bere planteamenduak eraman ditu udaletara.