Goierriko Hitza

Urriaren bigarren hamabostaldian hasiko dituzte Ordiziako San Joan auzoko urbanizazio proiektuaren lehen bi faseak. Bi fase horiek esleitu ditu dagoeneko Udalak. Urbanizazioaren %70 egingo dute bi fase horietan. Lur-sailak prestatzeko behar diren lur-mugimenduak eta eustormak egingo dituzte, baita saneamendu, ur-hornidura, argindarra, gasa eta telekomunikazio azpiegiturak ere. Gainerako urbanizazioa, %30a, beste zazpi fasetan egingo dute. Urbanizazio proiektu osoaren aurrekontua 10 milioi euro ingurukoa da.

Ordizia Lantzenen bidez egingo ditu Ordiziako Udalak obra horiek, baina lur-sailen jabeek ordaintzen dituzte urbanizazio-gastuak. Jose Migel Santamaria Ordiziako alkateak gaur adierazi duenez, herriarentzat "berebiziko garrantzia" duen proiektuaren bigarren zatia izango da etxeen eraikuntza. 10 hektarea baino lur-saila urbanizatuko dute: 30.000 metro koadro errepideak, espaloiak eta bidegorria egiteko izango da; beste 20.000 metro koadro bestelako ekipamendurako; 26.000 metro koadro berdegune eta espazio libreetarako, eta 30.000 metro koadro etxeak eraikitzeko.

Eraikiko dituzten 572 etxeetatik 415 babes ofizialekoak izango dira eta 157 libreak. Altuera ezberdineko eraikinak izango dira: 41 adosatuak izango dira, eta gainerako blokeek beheko solairua eta hiru, lau edo bost solairu izango dituzte, gehienez 19 metroko altuerakoak. Etxebizitza guztiek garajea eta trastelekua izango dute.

ETXEAK EGITEN DATORREN URTEAN
Datorren urtean hasiko dira etxebizitza horietako batzuk egiten. Santamariak azaldu duenez, joan den ostegunean onartu zuten Ordizia Lantzeneko administrazio Kontseiluan Udalak egingo dituen babes ofizialeko 60 etxebizitzen lizitazioa. Bi bloke izango dira, 30 etxebizitzatakoa bakoitza. Hil honen bukaeran argitaratuko dituzte 60 etxe horiek egiteko oinarrizko proiektua lehiaketara aurkezteko baldintza-plegua, eta datorren urtearen erdi aldera has daitezke lanean.

Babes ofizialeko etxeak eskatzeko izen-emate epea, berriz, datorren uda baino lehen zabaltzeko asmoa du Udalak.