Goierriko Hitza

Eguraldia lagun zela, jende ugari bildu zuen Zerainen egiten den Gipuzkoako Nekazaritza Ekologikoaren XIV. Azokak eta horrenbestez, pozik dira antolatzaileak. Aurten azokako protagonista sagardoa izan zen eta Zerainen bildutakoek goizean hasita sagarrak idiekin nola garraiatzen zituzten ikusi ahal izan zuten. Sagardo-sagarren eta zenbait tresnen erakusketaz gozatzearekin batera bi sagardo ekologiko desberdin ere dastatu ahal izan zituen jendeak. Barrikagile batek bestalde sagardoa gordetzeko barrikak nola egiten diren erakutsi zien.

Plazan jarrita zeuden postuetan hainbat produktu ekologiko ikusi eta erosi ahal izan ziren arratsaldeko ordubiak bitartean. Antolatzaileen hitzetan salmentak onak izan ziren.
Tailerren arrakasta ere urtetik urtera errepikatu egiten da. Aitziber Makazagak Aldabe Kooperatibako kideak jakitera eman digunez museo etnografikoak eta Aizpita Adieraztegiak ere bisitari kopuru handia izan zuten. Alde horretatik ere balorazioa ona da.
Arratsaldean, 18:30ean hasita, idi demak egin zituzten. Zumarragako Mujikak 34 plaza egin zituen eta Orioko Olidenek berriz, 30 plaza eta 7 metro, garaipena lehendabizikoaren eskutan geratuz. Gero aizkolariak lehiatu ziren. Bikote bakoitzak kanaerdiko 6na enbor ebaki zituen. Matxinandiarena eta Paskualik 11 minutu eta 33 segundu behar izan zituzten lana bukatzeko. Dorronsoro eta Mendiatak 11 minutu eta 58 segundu eta hirugarren bikoteak, Jauregik eta Lakiolak, 12 minutu eta 30 segundu.