Goierriko Hitza

Donostiako Administrazio Auzietarako Epaitegiak Ordiziako Udalak Ikena enpresari Oianguko lurrak ustiatzeko emandako kontzesioa epai bidez «zuzentzat jo» eta gero, Oiangu Parkea Bizirik Natur Elkarteak Bilbon dagoen EAEko Justizia Auzitegi Nagusian epai horren aurka helegitea jarriko duela iragarri du. Administrazio Gaietarako Epaitegiaren arabera, Oiangu Bizirik elkartea «ez dago legitimatuta» epaitegieta jo eta helegiteak jartzeko, kontzetsioa emateko prozesuan elkarteak ez zuela parte hartu argudiatuz. Irailaren hasieran kaleratu zuen epai hori Donostian dagoen auzitegiak.

Ordiziako Udalak orain ia hiru urte eman zion Ikena 2001 SL enpresari Oianguren parkea ustiatzeko kontzesioa, eta erabaki horren aurka helegitea aurkeztu zuen auzitegian Oiangu Bizirikek. Elkarte horren arabera, auzitegiaren epaiak «ez du aztertzen kontzesio horren legaltasuna», eta dioena da Oiangu Bizirik ez dagoela legitimatuta epaitegietara jotzeko.

HERRITARREN ESKUBIDEAK URRATU
Oiangu Bizirikek dioenez, parke publiko baten (eta ez ondasun pribatu baten) kontzetsioa denez, eta hirigintza legedien arabera hiritarrek administrazioaren erabakiak errekurritzeko eskubidea dutenez, helegitea jarriko dute EAEko Justizia Auzitegi Nagusian. «Guri eskubide hori ukatu egin zaigu, eta ondorioz, baita kontzetsioaren prozesuan parte hartu ez duen edozein ordiziarri ere». Helegiteak eragingo dituen gastu ekonomikoei aurre egiteko elkartearen bi kontu zenbakietan diru-ekarpenak egiteko deia egin die herritarrei Oiangu Bizirik Elkarteak.