Goierriko Hitza

Ormaiztegiko lagun-taldeek eta familiek kolore eta forma desberdinetako mozorroak jantzi eta kalera irten zuten atzo, lagun-taldeen eguna, mozorrotuen eguna, ospatzera.

Eguerdiko hamabietan mozorrotutako koadrila talde bat edo beste soilik ikusten zen kaleetan. Gazte asko artean ohean egongo zen eta beste asko jada mozorroak janzten.

Atzoko egunean mozorrotu ohi diren bakarrak ez dira, ordea, gazteak izaten; familiez osatutako taldeak ere ez dira atzera geratzen. Haurrek gurasoen mozorro berdinak zituzten jantzita, eta taldean ibili ziren alde batetik bestera giroaz gozatuz.

Eguerdian hasi zen giroa berotzen

Benetako festa giroa ordu bata eta erdiak inguruan sortu zen Ormaiztegin. Ordurako elizako karpa inguruan zebiltzan pailazoak, Ronaldinho ugariz osatutako futbol taldea, hippyak... Handik gutxira kale nagusian traktore baten zarata entzun ahal izan zen. Ormaiztegiko zenbait gazte zetozen bertan irribarretsu. Geldialdia ere egin zuten giro ona jartzeko helburuarekin. Traktorearekin batera beste zenbait ibilgailu berezi ere agertu ziren. Kame House izena zeraman batek idatzita; han sartuta japoniar marrazki bizidunetako pertsonaia batean oinarritutako mozorroak irudikatu zituzten.

Mozorro guztiak ziren dotoreak. Batzuk erositakoak eta besteak eskuz eginak; batzuk sinpleak eta besteak izugarrizko lanketa eskatzen duten horietakoak. Mozorrotu guztien helburua, ordea, ondo pasatzea eta giro ona jartzea.

Egun guztian zehar girorik onena jarritako taldeentzako sariak ziren banatzekoak.