Goierriko Hitza

San Sebastian egun handia donostiarrekin eta azpeitiarrekin lotzen da normalean, bi leku horietan modu berezian ospatzen baitute. Goierrin ere izaten da aukera, ordea, danbor hotsak entzuteko. San Sebastiani ohore egiten diotenak normalean ikastetxeak izaten dira. Eta aurtengoa ez da salbuespena izan. Atzo eskualdeko hainbat ikastetxetako haurrek eskolaren kanpora atera (eguraldi hezearengatik batzuk barruan ere aritu ziren) eta danborrak jo zituzten. Batzuk goizez, eta beste batzuk arratsaldez.

Kapelak buruan eta makilak eskuan zituztela

San Sebastian egunaren ospakizunak, gainera, aldez aurretiko prestakuntza ere eskatzen du, eta lanen emaitzak gustura erakusten zituzten umeek: kartulinak, paperak, margoak, kola eta bestelako materialak erabiliz, eurentzako egin zituzten sukaldari kapelak. Ez zitzaien xehetasunik falta: guztiek zituzten aurrealdean goilarea eta sardexka, batzuk hobeto eta besteek okertxeago margotuta edo jarrita.

Sarriegi musikagilearen martxen doinuak entzun bezain pronto indar handiz hasi ziren ikastetxeetako haurrak danborra joz. Askok inguruan zituzten gurasoak eta aitona-amonak ere, eta tarteka haiei begiratzen zieten. Danborra jotzen erabilitako indarraren ondorioz batek baino gehiagok berria erosi beharko du hurrengo urtean baina aurpegian irribarrea ikusten zitzaien Goierriko umeei atzo.

Ikastetxe bakoitzak ospakizunari bere ukitua eman zion arren, antzeko irudiak ikusi ahal izan ziren besteak beste batean eta bestean. Goierri behealdeko eta goialdeko herri askotan atera ziren jolastokietara haurrak. Gaur gauerditik aurrera helduen txanda izango da.