Goierriko Hitza

AHTren kontrako ekintza batean parte hartzeagatik auzipetutako bi gazteek jendaurreko agerraldia egin zuten atzo Beasainen. Bertan, «benetako delitua AHT» dela salatu zuten. Euren kontrako epaiketa Espainiako Auzitegi Nazionalera bideratu nahi izatea «erokeria politiko-judiziala» dela esan zuten.

Ehun eta berrogeita hamar lagunek eman zieten babesa atzo auzipetu goierritarrei, AHTren kontrako kartelekin. Bi gazteak aurpegia estalita agertu ziren. «Amorrua eta indignazioa» sentitzen zutela azaldu zuten. «Gaur egungo justizia ustel honetako arduradun nagusientzat, mundu kapitalista honetako inposizioen aurka eta amalurraren alde borrokatzea terrorismoa izan daiteke». Horren aurrean «errepresio modu zikin honen bitartez» ezingo dutela «herriaren ahotsa isildu» gogorarazi zuten.

«Kriminalizatzeko asmoa»

Bi auzipetuek AHTren kontrako protesta ekintza batean parte hartu zuten Beasainen, joan zen azaroaren 3an. Goierriko AHT Gelditu Elkarlanak deituta, Zaldizurreta kaleko zebra-bidean aurrera eta atzera ibili ziren hainbat lagun, trafikoa oztopatuz eta handik pasatzen zirenei AHTren obrak hasi zirela jakinaraziz eta proiektuaren inguruko informazioa banatuz. Elkarlanak azaldu duenez «protesta baketsua» izan zen eta iraun zuen bitartean ez zuten inor identifikatu eta atxilotu.

Egun batzuen buruan jakin zuten bi gaztek auzipetu egingo zituztela, Ertzaintzaren «begizko identifikazio» batean oinarrituta. Desordena publikoa sortzeagatik falta delitu bat leporatuta, aste honetan hastekoa zen epaiketa Tolosako epaitegian.

Epaitegi horrek, ordea, kasua Espainiako Auzitegi Nazionalaren esku uztea eskatu zuen bi egun geroago, «terrorismo» zantzuak daudela argudiatuz eta «AHTren aurka borrokatzea ETAren estrategia barruan» dagoela azalduz. Tolosako epaitegiko autoak dioenez, «ETAk egindako azken adierazpen publikoan AHTren obrak gelditzea bere helburu nagusietako bat dela azaltzen du»; horregatik, gaiaren inguruan erabaki bat hartzea Auzitegi Nazionalari dagokiola dio.

Hala ere, euren kontrako epaiketa Madrileko Auzitegi Nazionalera iristen bada, «kontzientzia lasai eta burua tinko» izango dutela adierazi dute, «jakin badakigulako AHT dela benetako delitua». Azkenik, «borrokan jarraitzeko deia» egin zuten bi auzipetuek, «gure bihotzean sentitzen duguna beraiek sortu nahi diguten beldurra baino handiagoa baita».

Erabakiaren atzean tren azkarraren kontrako mugimendua «ETArekin lotzeko eta kriminalizatzeko» asmoa dagoela salatu du AHT Gelditu elkarlanak.

Zundaketak hasi dira

Atzo eman zuten prentsaurrekoaren ondoren, Beasainen dagoeneko zundaketak egiten hasi direla ere salatu nahi izan zuten Goierriko AHT Gelditu plataformako kideek.

Prentsaurrekoaren ondoren, zundaketen kontra protesta egiteko elkarretaratzea egin zuten Beasaingo kiroldegian, Sondeoak Gelditu, AHTrik ez lelopean. Ondoren, ehun lagunetik gora joan ziren oinez zundaketak egiten ari diren lekuraino.