Goierriko Hitza

Irabaztea beste erremediorik ez zuen Ampo Ordiziak herenegun Bartzelonako La Foixarda zelaian jokatutako partidan, eta hala egin zuen. Ez ziren goierritarrak oso fin hasi, baina bigarren zatian talde sendoagoa dutela erakutsi zuten, eta mendean hartu zuten FC Bartzelona (11-24). Etxetik kanpo irabazitako aurreneko partida ere izan zen igandekoa, eta horrek ere badu garrantzia. Garrantzitsuena, hala ere, datorren igandean Jeep Alcobendasi irabaztea da. Hala eginez gero, Ohorezko Mailan segituko du Ampo Ordiziak, eta Alcobendas jaitsi egingo da. Emozio handiko partida izango da, duda izpirik gabe.

Ampo Ordiziako jokalariak uzkurtuta atera ziren FC Bartzelonaren zelaira, urduri, ondotxo baitzekiten zer zuten jokoan. Kataluniarrak hasi ziren irabazten, Zorrok eta Piazentinik hagetara egindako bi jaurtiketari esker (6-0). Presiorik gabe zelairatu ziren kataluniarrak. Ez zuten ezer galtzekorik, eta ausart jokatu zuten, izkin guztietatik erasoan, eta baloi lapurtzeko eginahal batean. Ampokoak joko horretan kateatu ziren aurreneko hogei minutuetan, harik eta Tarraguelek entsegua lortu zuen arte 25. minutuan, eta Catchpolek transformazioa (6-7).

Atsedenaldiko hitzak

Aurreneko zatiaren bukaeran Ampo Ordizia izan zen nagusi, baina ez zuen beste entsegurik lortu. Atsedenaldian Axio Araña entrenatzaileak estu hartu zituen jokalariak, eta bigarren zatiari gogor ekiteko eskatu zien. Madrilen Alcobendas irabazten ari zen, eta derrigorrean irabazi behar zuten Arañaren mutilek.

Amorratuta ekin zioten bigarren zatiari, eta berehala sumatu zen partida txikitu nahi zutela. White hiru laurdenekoak eta Rosser aurrelariak entsegu bana lortu zuten (tartean kataluniarrek beste bat), eta partida esku-eskura zuten (11-21). Catchpolek zigor-kolpe bat sartu zuen partidaren hondarrean, eta partida erabakita utzi. Bikain aritu zen Catchpole joko zabaltzailea.

Datorren asteburuan bukatuko da liga. Partida zirraragarria izango da Jeep Alcobendasen aurkakoa, eta Trebijano zaharra lekuko.