Goierriko Hitza

Loreen eta Landareen udaberriko VIII. Azokan hiru protagonista izan ziren herenegun Seguran: loreak, euria eta jendea.

Hamahiru lorezainek parte hartu zuten saltzaile modura, 12 gipuzkoarrak, bat nafarra. Horien artean bost ziren goierritarrak. Lore aukera ikaragarria zegoen: begoniak, arrosak, alegriak, erramuak, kaktusak, bonsaiak... Kolore bizitasuna zen nagusi postu guztietan, eta gustuko dituztenek begiak gozatzeko aukera izan zuten.

Azoka ireki zutenean artean ateri zegoen, baina euria hasi eta ez zen geratu eguerdi guztian. Hori bai; bertaratutako jendeak, eta baita lorezainek eurek ere, eskertu zuten plazako estalpe handia. Azoka ikusgarria izan arren, ordea, distira apur bat kendu zion euriak.

Goizean goiz esnatu eta eguraldi ona ikusi zuen askok aukeratu zuen Segurako azoka goiza pasatzeko. Laster hasi ziren betetzen plaza eta inguruak. Euria ikusi eta lore azokara joateko asmoa zuten zenbait lagunek planak aldatu egin zituzten. Beste zenbaitek aterkiak hartu eta Segurarako bidea hartu zuen. «Goizean jende asko zebilen. Itxurazko feria baten traza hartzen hasia zen, euria hasi duen arte. Gero ere jende asko ibili da, ezin gara kexatu, baina ez da gauza bera. Jende asko etorri da, behar zuen lore edo landare hura erosi du eta joan egin da. Hori dela eta, artisau eta gastronomia postuetan geudenontzat ez da horren azoka ona izan», azaldu du Ageda Zeberio antolatzaileak.

Loreen eta landareen salmentari dagokionez aniztasuna izan zen nagusi. Lorezain batzuk «nahiko gustura» zeuden, besteak ez horrenbeste. Zeberioren hitzetan «karpa barruan zeuden postuetan jende gehiago ibili da landareak erosten; eta kanpoan zeuden bi lorezainek, berriz, azoka bukatu baino lehen alde egin dute, erabat bustita».

Inoiz ez duela denen gustura euririk egiten, eta bonsaizalea berriz oso gustura zegoen, sekula baino salmenta hobeak izan zituela esanez. Txerto desberdinen inguruko ikuskizunak ere arrakasta handia izan zuen.