Goierriko Hitza

Binakako Urrezko Aizkolari Txapelketan egindako lanaren ondoren, ikusmin handia sortu zen Ataunen larunbatean, Aierbe II.ak egin zezakeen lana ikusteko. Aierbe momentu onean dago, eta banakakoan ere lehiatzeko prest dagoela erakutsi zuen larunbatean, jaioterrian.

Zortzi aizkolari aritu ziren lehian, buruz buru; hurrengo kanporaketarako lau txartel zeuden jokoan. Aierbe II.a zen bere kanporaketako faborito nagusia, eta ez zuen hutsik egin. Jokatutako hiru probetan gailendu zitzaion Zubizarretari. Ataundarrak 8 minutu eta 59 segundo behar izan zituen lanak bukatzeko, azpeitiarrak baino minutu bat eta bost segungo gutxiago. Aierbe II.a hurrengo fasean izango da.

Javier Aranberri Elorriaga zumarragarrak ez zuen halako zorterik izan, eta agur esan behar izan dio txapelketari. Kañamares nafarraren kontra galdu egin zuen. 11 minutu eta 43 segundoan bukatu zituen lanak, nafarrak baino minutu eta erdi gehiagoan.

Gainontzeko bi kanporaketetan ere ez zen sorpresa handirik izan. Atutxa II.ak egin zuen saiorik onenetakoa, Etxebeste mendean hartuta. Bizkaiko txapeldun gazteak 7 minutu eta 38 segundo behar izan zituen hiru probak egiteko. Aipatzeko modukoa da 45 ontzako enborra 39 segundoan ebaki zuela, orain arteko marka guztiak puskatuz. Etxebestek ere denbora ona egin zuen, baina lehiaketatik kanpora gelditu da.

Beste kanporaketan, Zubiagak irabazi egin zion Mugertza II.ari. Mutrikuarra aurretik hasi bazen ere, Zubiagak buelta eman zion lehiari, eta 8 minutu eta 58 segundoan bukatu zuen.

Joxe Ugarteburuk ere agur esan dio txapelketari

Ataungo saioaz gain, igandean beste kanporaketa bat jokatu zuten Lekunberrin (Nafarroa). Han Joxe Ugarteburu ezkiotarrak ere agur esan dio Urrezko Aizkolarien trenari. Senosiain II.a zuen aurkari. Lehen bi probetan aurre hartu bazion ere, Olaguekoak 20 segundoko aldea atera zion azkenerako.