Goierriko Hitza

Urtarrilean hasitako IX. Eire-Bankoa xake txapelketa igandean bukatu zen Eire tabernan jokatutako finalarekin. Mikel Leon elgoibartarrak irabazi du Osesen aurka. Iriberri antolatzaileak parte-hartze handia azpimarratu du.

Idatzi da dagoeneko Urretxuko aurtengo xake nobela. Bederatzigarren urtez idatzi dute Eire tabernan. Mikel Leon elgoibartarrak jantzi du irabazlearen txapela, Eire-bankoa txapelketako irabazlea bera izan baita. Stefan Zweig idazle austriarrak 1941ean idatzitako Xake nobela eleberria gizon batek xakearekiko duen obsesioaz mintzatzen da; haren aurkaria, Gestaporengandik ihesi doan austriar bat. Nobelaren muinean, xakearen bitartekaritzarekin giza-izaeraren azterketa. Eleberria Xabier Mendigurenek itzuli zuen euskarara 1998an, Alberdania argitaletxearekin.

Igandean jokatu zuten Eire-bankoa txapelketako aurtengo finala Mikel Leonek eta Iñaki Osesek. Lehenengo partidan, ordubetekoa, berdin gelditu ziren, eta hamabost minutuko partidan erabaki zuten aurtengo irabazlea nor izango zen. Urduri zeuden biak, mugimendu bakoitza berebizikoa bailitzan. Akaso, Zweig idazleari jarraiki, jokalari bakoitzaren izaeraren lorratzak topa zitezkeen jokaldi bakoitzean.

Eire tabernan xakezale ugari elkartu ziren. Azkeneko partidari buruz norbaitek esan zuen «hamabost minutuko partidak futboleko azken penaltiak bezalakoak» direla; «denbora gutxian guztia erabakitzen da». Oses urretxuarra bat dator: «Denbora gainean nuela ikusi dut eta partida irabazita eduki dudan arren, ez dut lortu».

Nobela, taberna batean

Mikel Leonek dioenez beretzat politena taberna batean jokatzeko aukera izatea da. «Partidak aurkariarekin zehazten dituzu, eta horrek txapelketa lanarekin bateratu ahal izatea ahalbidetu dit». Pozik agertu da irabazi izanagatik. Elgoibartarra bera, Sidenorren lan egiten du, eta txapelketaren berri han jaso zuen. «Ez nuen irabaztea espero. Gainera ordubeteko partida guztiak berdindu egin ditut lau lehenengoekin».

Bere izaeraren aztarnei jarraiki «azken partidan banekien denboragatik soilik irabaz nezakeela eta mugimendu azkarrak egiten jardun dut Iñakiren denbora-ikurrina noiz eroriko zain».

50 lagunen nobela

Txema Iriberri antolatzaileak gustura amaitu du aurtengo nobelaren idazketa. «Azpimarragarriena parte-hartze handia eta Alberto Citores jokalariaren heriotza. Partiden emaitzetako sorpresak ere sekulakoak izan dira».