Goierriko Hitza

Ume, gazte eta heldu. Denek gozatu nahi izan zuten atzoko eguna, eguzkitsua, dotorea, askoren ahotan entzun zen bezala. Jende asko inguratu zen Larraitzera (Abaltzisketa) atzo, Aralarko larreak irekitzeko festara. Iaz ez bezala aurten eguraldia lagun, jai giroa nagusitu zen goizean goizetik.

Joan deneko urteetan ohitura bilakatu da maiatzaren 1ean egiten den urteroko festa. Enirio-Aralarko Mankomunitateak antolatzen du, eta egun horretan ofizialki Aralarreko larreak ganaduarentzat irekitzen dituzte, jai giroan egin ere.

Egitarau bete-betea

Urtero bezala egitarau mardula prestatu zuten atzorako ere. Goizeko hamarretan zabaldu zituzten postuak, eta handik aurrera dena izan zen festa Larraitzen, alde guztietan baizegoen zer ikusia: zaldiak, behorrak, astoak, idiak, artzain txakurrak, ..animalia ugari zebilen Aralarko larretan, eta haien inguruan jendetza. Tradizioa eta festa elkarri eskutik helduta joan ziren. Erakustaldi ugari izan zen; adibidez, herri-kiroletan Mari Jose Sardonek ikusmin handia piztu zuen 113 kiloko harria jasota. Jexuxen Jazzapanakoak musika eta guzti bertan izan ziren giroa alaitzen. Ez ziren bakarrak izan, ordea. Bentazaharreko Mutiko Alaiak taldekoak goiz osoan aritu ziren abesti herrikoiak kantatuz, jendeak lagunduta, gainera. Liburuska bat banatu zuten jendearen artean eurei kantuan laguntzeko eta asko izan ziren haiekin bat eginda ibili zirenak goizean zehar.

Salbamentuko txakurrak

Berrikuntza bat ere izan da aurtengoan. Aurreneko aldiz, Larraitzen Euskal Herriko salbamentuko txakur taldearen erakustaldia izan zen. Erakustaldiaren helburua larrialdi edo istripu bat gertatzen den kasuan salbamenduko txakurrek egiten duten lana erakustea izan zen.