Goierriko Hitza

Lasai egon daitezke dagoeneko urte osoa herriko festen zain ematen dutenak, Beasaingo Loinatz jaien usaina nabari baita dagoeneko herriko kaleetan: txosnak jarrita daude, barrakak ere gerturatu dira, mozorroak armairuan daude, festarako grina aurpegietan nabari da eta Loinatz jaietako izarra den Mari ere jaisteko prest dago.

Luze egingo zitzaizkien aurten aurreratuta etorri diren Aste Santuen ondorengo berrogei egunak batzuei. Aurten Lazkao, Legorreta, Legazpi eta Beasain, guztiak ia parean ospatzea egokitu da egutegiak hala bideratuta. Aukera zabala beraz, festa giroa nahi duenarentzat Goierri eskualdean.

Marirekin hasi

Urtero bezala, Mariren jaitsierarekin emango zaie hasiera Loinatz jaiei, nahiz eta aurretik ere hainbat ekintza antolatuta dauden.

Bi asteburuetarako egitaraua prestatuta dago Beasainera inguratzen direnek zer ikusia izan dezaten. Gaurko ekitaldi nagusia Mariren jaitsiera izango bada ere, bihar izango denetatik zer aipatua ere bada; «Beasain Jaietan» urtekaria salgai jarriko dute. Baina horretaz gain, biharkoan burrunba hotsak nagusituko dira Beasaingo kaleetan. Goizean goiz umeen danborrada izango da. Iluntzean kalejiran ibili ondoren, gauerdian Loinazko San Martin plazan bilduko dira azken joaldia egiteko.

Etzi berriz, Sokadantza ikusteko aukera izango da; legealdi honetako udalbatzaren lehen sokadantza izango da gainera. Etxeko txikienentzat ere Poxpolo, Mokolo eta konpainiak eskainitako ikuskizuna izango da eta bertsozaleentzat berriz, triki-bertso poteoa. Gaueko ilunari argi puntua emateko su-festa ere ikusiko dugu etzi gauean.

Urtero legez, astelehena lagun talde edo kuadrilen eguna izango da. Ordurako indar guztiak xahutu ez dituenak, futbito txapelketa, giza-futbolina edota lagunarteko olinpiadak izango ditu aukerako hitzordu.

Lehenengo asteburuko azken eguna asteartean izango da eta bertan azoka berezia ikusteko aukera izango da. Barazki lehiaketa eta azienda eta hegaztien erakusketa izango dira, baita artisau azoka ere, eta tripa zorriak baretu nahi dituenarentzat talo dastaketa ere izango da.

Trafikoan eragina

Loinatz jaietako ospakizunak direla eta, Beasaingo herriguneko trafikoa etenda geldituko da zenbait egunetan. Osasun zentrotik herrirako sarbidea ere itxi egingo da maiatzaren bi eta bederatzian, iluntzeko 19:00etatik goizaldera arte. Maiatzaren 3, 4, 5 eta 10ean berriz, 24 orduz itxiko dute eta maiatzaren 6 eta 11n goizeko 6:00etatik 21:00etara bitartean izango da itxita aipatu sarbidea.

Datorren asteburuan segi

Loinatz jaietan bost egunez ibili eta festarako gogoz geratzen denak jarraipenerako aukerarik ere izango du Beasainen. Asteazken eta ostegunerako zenbait ekitaldi antolatuta badaude ere, datorren asteburuan izango da berriro festetarako eta parrandarako aukera.