Goierriko Hitza

Ordiziako Delikatuz Elikadura eta Gastronomia Zentroak datorren astean ekingo dio Delikatuz Bizi ekimenaren aurtengo kanpainari. Gipuzkoako herritarrak elikadura osasungarriaren inguruan sentikortu eta heziketa ematea da kanpaina horren helburu orokorra. Aurten, jarduera fisikoak osasunean duen eragin positiboa eta elikadura ohitura osasungarriekin duen harremana jorratuko du Delikatuz Bizi ekimenak. Horregatik jarri diote Bizi delikatuz eta mugituz goiburua kanpainari.

Aurtengo programa Gipuzkoako lau sukaldaritza eskolatan emango diren elikadura osasungarriari buruzko ikastaroekin hasiko da. Zarauzko Aiala Ostalaritza Eskolan, Donostiako Cebanc-Cdea ostalaritza goi eskolan, Donostiako El txoko del gourmet sukaldaritza eskolan eta Ordiziako Goierri Lanbide Eskolan dira ikastaroak.

Goierrin hiru ikastaro

Goierri Lanbide Eskolan hiru ikastaro emango ditu Pedro Lamasek. Aurrenekoa, maiatzaren 8, 9, 13 eta 15ean izango da, gazteleraz. Bigarrena, maiatzaren 20, 22, 27 eta 29an, hori ere gazteleraz, eta hirugarrena ekainaren 2, 4, 9 eta 11n, euskaraz. Matrikulak 10 euro balio du. Izena emateko eta ordutegiei buruzko informazio gehiago izateko 943 88 22 90 telefono zenbakira deitu beharra dago, edota www.delikatuzbizi.com webgunea kontsultatu.

Ikastaro bakoitzeko saio batean elikadura tailer bat emango du nutrizionista batek, eta parte hartzaile bakoitzak Delikatuz Bizi sukaldaritza osasungarria errezeta liburua jasoko du.

Ikastetxeekin lanean

Aurten ere Gipuzkoako hainbat ikastetxetako ikasleak Jan eta jan... baina mugitu unitate didaktikoa lantzera joango dira Delikatuzera, eta urriaren 15ean ekintza bateratu bat egingo dute bertan. Azaroan, berriz, elikadura-osasuna eta jarduera fisikoaren inguruko bi jardunaldi egingo dituzte, EHUko Psikologia fakultatearekin batera.