Goierriko Hitza

Idiazabalgo Gazta Egunaren atarian, herriko mamirik onena aukeratzeko lehiaketa egin dute.

Gaztaren egun handia ospatuko dute gaur Idiazabalen. Besteak beste, ardi latxaren esneak ematen duen jakia goratzeko sortu zen festa hau. Baina esne honetatik, beste produktu batzuk ere sortzen dira. Mamia da hauetako bat. Urtetan Euskal Herriko baserrietako postre ofiziala izan da mamia, gaztarekin batera. Galbidean utzi beharrean ordea, duela bederatzi urte hasi ziren Idiazabalen mami lehiaketa egiten, herritarrak ere jaki gozo hau prestatzera bultzatuz.

Urtez urte, dozenaka herritarrek parte hartu izan dute lehiaketa honetan. Aurtengo edizioan, hamaika lagunek eman zuten izena. Ostiralean egin zuten mami onenak aukeratu eta sariak emateko ekitaldia, Idiazabalgo jubilatuen elkartean.

Lehiakideekin batera, bost epaimahaikideak bildu ziren ekitaldian. Mamirik onena zein zen aukeratzerako orduan, hainbat faktore izaten dituzte kontuan. Aurrenekoa itxura eta kolorea izaten da, begiz sartzen dena. Ondoren, mamia probatzen dute, ahoan uzten duen testura, zaporea eta erabili den gatzagia neurtzeko. Usaina ere kontuan izaten dute puntuak ematerako garaian.

Aurkeztu ziren hamaika mamien artetik, sei aukeratu zituzten aurrena. Haien artetik, hiru irabazleak atera zituzten ondoren. Aurreneko saria, Belen Berasategik eraman zuen. Bigarrena, Xabier Mingezek, eta Arantxa Aierbek jaso zuen hirugarren saria.

Hirurei, koadro bana eman zitzaien opari moduan. Probaren amaieran antolatzaileek azaldu zutenez, datorren urterako orri bat prestatzeko asmoa dute, partehartzaileek jakin dezaten nola puntuatzen duten eta zer baloratzen duten gehien.