Goierriko Hitza

Bihar, maiatzak 8, murgilduko dira urteko jaian ezkiotarrak. San Migelen festan meza eta hamaiketakoa antolatu dituzte bihar goiz eta eguerdi parterako. Egun guztian zehar Oria eta Laja trikitilarien doinuaz gozatzeko aukera ere izango dute Ezkio herri gunekoek zein bertara hurbiltzen direnek. San Migel eguna aste barrua izanik, larunbaterako eta iganderako prestatu dituzte ekitaldirik gehienak, adin guztietako pertsonek auzoko festaz goza dezaten.

Larunbat eguerdiko hamabietan ekingo diote egitarauaren mardulenari, Ezkioko IV. Gastronomia Lehiaketarekin. Pintxo platerkada bat prestatu beharko dute parte hartu nahi dutenek, nahi dituzten osagaiak erabiliz.

Pintxoak prest dituztela auzoko pilotalekura agertu behar dute 11:30etik 11:45era bitartean. Epaimahaikoen iritzia zehaztu eta jende artean banatuko dituzte jakiak. Janariarekin batera herrian egindako sagardoa zerbitzatuko dute.

Behin pintxoekin apetitua piztu eta gero, bazkari herrikoia egiteko bilduko dira denak frontoian. Menuan, besteak beste, paella izango da. 18 urtetik gorakoek 10 euro ordiandu behar dute bazkaltzeko, 18 urtetik beherakoek ez dute dirurik jarri beharrik izango.

Bazkal ondoren haurrak izango dira protagonistak. Altxorraren bila eta beste zenbait jolasetan parte hartzeko aukera izango dute. Helduek ere festa giroa gal ez dezaten mus txapelketari ekingo diote. Egunari bukaera eman aurretik txokolate-jana eta herri afaria ere egingo dituzte. Eguneko ekitaldirik garrantzitsuenak edo jenderik gehien bilduko dutenak behintzat jan-edanaren bueltan antolatutakoak izango dira: gastronomia lehiaketa eta bazkari zein afari herrikoiak.

Igandean kirola izango da nagusi

Kirolaren inguruan antolatu dute batez ere igandeko festa, nahiz eta goiz partean mezaren ondoren Goruntz taldeak dantza saioa eskainiko duen.

Goizean gaztetxoak ariko dira pilotan norgehiagoka. Eguerdi partean, 12:30ean, toka txapelketan parte hartuko dute helduagoek. Izen-ematea 13:30 artekoa izango da.

Igande arratsaldean, festei bukaera emateko, herri kirol saioa ikusi ahalko da Ezkion. Aizkoran, Otaegi eta Esnaola bikoteak Atutxak eta Ugarteburuk osatutako bikotea izango du aurkari.

 

egitaraua

Bihar, maiatzak 8, San Migel eguna 11:00. Meza Nagusia.

12:00. Lunch-a.Egun guztian. Oria eta Laja trikitilariak.

Larunbata

12:00. Pintxo lehiaketa herrikoia egingo dute.

14:00. Bazkari herrikoia. 17:00. Haur jolasak.

17:00. Mus txapelketa.

19:30. Txokolate-jana. 21:00. Herri afaria.

Egun guztian. Trikitia.

Igandea

11:00. Gaztetxoen pilota jaialdia.

12:00. Meza, herrian hildakoen alde. 12:30. Goruntz dantza taldearen erakustaldia.

12:30. Toka txapelketa.

18:30. Herri kirolak. Egun guztian. Egun guztian Elorza anaia trikitilariak ariko dira giroa berotzen.