Goierriko Hitza

Goierri beheko zazpi herritako gaztetxoek parte hartuko dute Lazkaoko Antzar Kirol Elkarteak antolatu duen Goierriko II. Eskolaumeen Pilota Txapelketan. Larunbat honetan hasiko dira aurreneko partidak, Lazkaoko pilotalekuan. Txapelketak zazpi aste iraungo du, eta ekainaren 28an jokatuko dira finalak.

Antzar kirol elkartetik azaldu dutenez, «partaidetza» da txapelketa horren oinarria. Eskola adinean dauden bailarako pilotari guztiei ireki diete deialdia. «Haurrei pilotan lehiatzen jarraitzeko aukera eman nahi diegu; hau dela eta, sustatu nahi dena parte-hartzea da, errendimendua baino gehiago».

Aurten Goierriko zazpi herritako taldeek parte hartuko dute txapelketan, maila desberdinetan banatuta. Ataun, Idiazabal, Lazkao, Ordizia, Zaldibia, Zegama eta Segurako pilotari gazteak ariko dira jokoan, denak 1997 eta 1999 urteen artean jaioak.

Hutsunea bete nahian

Antzar elkartetik azaldu dutenez txapelketa «hutsune bat» betetzera dator. «Eskola adinekoen lehiaketa jardunaldiak Gipuzkoako Foru Aldndiak ezarritakoetara mugatzen dira, hau da, Eskola Kiroleko jardunaldietara. Jardunaldi ak azarotik apirilera bitartean ospatzen dira, eta beraz, bost hilabete baino gehiagoan lehiaketarik gabe gelditzen dira haurrak».

Bost hilabeteko etenaldia ikusita, Gipuzkoako Euskal Pilota Federazioaren planteamenduari eustea erabaki zuten, eta «Goierri bailarako eskola adineko pilotarien beharrei erantzuteko asmoz, jardunaldi kopurua handituko duen txapelketa antolatzea» erabaki zuten. Iaz egin zuten Goierriko eskolaumeen txapelketa aurreneko aldiz. Pilotari kopuru handia bildu zuen, eta antolatzaileak gustura gelditu ziren emaitzarekin.