Goierriko Hitza

Bihar eta maiatzaren 15ean Urretxuko eta Zumarragako ikastetxe guztietako LH4 eta LH5 mailetako ikasleek Gu ere bertsolari egitasmoan parte hartuko dute. Egitasmo horretan ikasleek bertsoak antzerkiarekin batuko dituzte, eurek sortutako bertso-antzezlana eskainiz.

Gipuzkoako Bertsozale Elkarteak sortutako ideia da Gu ere bertsolari. Biharko saioan Labeaga aretoko oholtzan hamarka gaztetxok kantatuko dute, 19:00etatik aurrera. Hurrengo saioa, hilaren 15ekoa, Zelai Arizti aretoan izango da, 19:00etan baita ere.

Gainzuriko, Urretxu-Zumarraga Ikastolako eta La Salle-Legazpiko ikasleek eskainiko dituzten bertso saioak ordubete iraungo du.

Ahozkotasuna sustatuz

Duela zortzi urte Bertsolaritza eta ahozkotasuna proiektua ikastetxeetan lantzen hasi zen Gipuzkoako Bertsozale Elkartea.Urtez urte zabalduz joan da proiektua, eta 36 herritako 96 ikastetxek parte hartzen dute orain, ikasleak guztira sei mila inguru.

Bihar eta hilaren 15ean ikasleek eskainiko dituzten bertso saioak «ikasleen lanaren ondorio» direla gogoratu dute antolatzaileek. «Emanaldietako ideiak eta bertsoak neska-mutilek landu eta sortu dituzte, eta eurak izango dira protagonista oso eta bakarrak», diote Bertsozale Elkartetik.

'Bertsometa'

Ikasturte osoan lantzen dute eskoletan bertsolaritza, eta egindako lana erakustea ikasleentzat garrantzitsua dela diote arduradunek, «baita taldean bideratutako proiektu bat konpartitu eta emaitzak elkarrekin gozatzea ere».

Bertso saioetan oinarritutako liburu bana jasoko du ikasle bakoitzak ikasturte amaieran. Bertsometa izeneko liburuak Gipuzkoako talde guztiak bilduko ditu. Liburuan talde bakoitzaren argazkia eta eurek egindako bertsoak geratuko dira jasota.