Goierriko Hitza

Ataungo nekazariek landutako produkturik onenak sarituko dituzte beste behin ere San Isidro egunean. Gaur zortzi, hilaren 15ean ospatuko dute nekazarien eguna Aia auzoan. Barazki eta ziza lehiaketak, erakusketa eta bazkaria egingo dituzte.

Badira urte batzuk San Isidro egunez herriko produkturik onenak saritzen hasi zirela. Urtero auzoz aldatzen joaten da festa, eta aurten Aian ospatuko dute. Goizeko hamaiketan irekiko dituzte postuak. Bertan herriko barazki, ziza eta gaztak ikusi eta erosteko aukera izango da. Hamabietan meza egingo dute Aiako elizan. Ospakizunekin bukatzeko bazkaria egingo dute Urbitarte sagardotegian. Bazkarira joateko asmoa dutenek udaletxean eman behar dute izena, 943 18 00 11 telefono zenbakira deituta.

Barazki eta ziza lehiaketak

San Isidro egunean ohitura den moduan, herriko barazki eta zizarik onenak aukeratu eta sarituko dituzte. Edozein ataundarrek parte har dezake lehiaketa horietan. Baldintza bakarra barazkiak norberarenak eta herriko lurretan haziak izatea da.

Nekazari bakoitzak gutxienez bost barazki mota aurkeztu beharko ditu lehiaketara, eta egokitzen zaion postuan jarri beharko ditu erakusgai. Barazki onenak eramaten dituenak 72 euroko saria jasoko du. Aurreneko sei lehiakideentzat ere izango dira sariak.

Barazkiez gain, zizarik onenak ere aukeratuko dituzte azokan; horientzat 36, 24 eta 12 euroko sariak izango dira, aurreneko hiru sailkatuentzat.

Udaletik baserritar, artzain, nekazari eta herritar guztiei egin diete San Isidro eguneko ekitaldietan parte hartzeko gonbitea.