Goierriko Hitza

Igande honetan izango da Iñaki Beitiaren omenezko XII. Mendi Martxa, eta ia guztia dago prest, azken orduko ukituak falta badira ere. «Lan guztiak izendatuta ditugu, taldeak eginda, ibilbideak prest, erosketak ere abian dira... Hau da, aldez aurretik antola daitekeen guztia antolatu dugu», diote arduradunek.

Ibilbide luzea egiten dutenak goiz hasiko dira igandean ibilian, 06:00etan elkartuko dira 54,4 kilometro egiteko. Urretxu-Zumarragan hasi, Zerain eta Mutiloatik pasatu, eta Izazpi, Aizpurutxo eta Irimo tontorretatik itzuliko dira. Ibilaldi laburrerako irteera mailakatua egingo da, eta hori da aurtengo berritasunetako bat. 08:00etan hasiko dira irteten, ordu erdian, 24,5 kilometro egiteko. Samiño eta Oletatik, Aipurutxora jaitsi eta Irimotik itzuliko dira.

Ibilbide luzean barrena sei jan-edan postu jarriko dituzte, eta beste hiru ibilbide laburrean. Horrez gain, antolakuntza aldetik behar diren segurtasun neurriak kontuan hartu dituzte.

Izena emateko prozesua

Izen-emateari dagokionez oraindik ere irekita dago epea, eta antolatzaileek zalantzan daudenak animatu dituzte. «Internet bidezko izen-ematea ondo doa, eta gainontzekoa ere bai. Dena den, jende asko azken orduan animatzen da, horretan ere eguraldiak eragina izaten du eta».

Iganderako eguraldi iragarpenek «onegia ez» dela izango diote. Baina iaz ere halakoxea zegoen iragarrita, eta 1.100 lagun bildu ziren irteeran eta 830 inguruk bukatu zuten ibilbidea, «bustita baina gustura».

Azken ordukoak

Antolatzaileek azpimarratu dutenez, aurreko urteetako datuei begira, azken orduko izen-emateak «oso kontuan» hartuko dituzte.

Oraindik izena eman ez dutenek beitia.org webgunean, Urretxuko eta Zumarragako kiroldegietan, eta Osadar mendi taldearen egoitzan egin dezakete. Era berean, martxaren webgunean informazio zabala aurki daiteke.

Igandeko mendi martxarekin Aizpurutxon jaiotako baina Urretxu-Zumarragako egunerokotasunean murgildutako Iñaki Beitia gogoan izango dute berriro ere.