Goierriko Hitza

Legazpi, Urretxu eta Zumarragako 3.138 ikaslek kontsumoaren eta hondakinen gaia landu dute ikasturte honetan Eskolako Agenda 21en barruan; euren proposamenak eman dizkiete orain udal ordezkariei.

Ama, nahi dut. Zer nahi duzu? Tigre bat. Niri ere gustatuko litzaidake tigre bat edukitzea eta ilargia ere niretzako nahiko nuke, baina ezin da, ilargia guztiona da». Nahi eta ezin, etengabean handik eta hemendik hamaika irudi, hamaika mezu garden edo ezkutu gauzak desiratzen jarraitzeko. Umeei dena ezin dela lortu esateko moduak badaude, eta uler dezakete. Helduek ulertzen al dute, ordea?

Legazpi, Urretxu eta Zumarragako ikastetxe guztietako ikasleek kontsumoaren eta hondakinen gaia landu dute aurtengo ikasturtean. Guztira 3.138 ikasle aritu dira gaia aztertzen. Legazpiko ikasleek lehenengo, eta atzo Urretxukoek eta Zumarragakoek norbere herriko alkateari kontsumo eta hondakinen inguruan egindako hausnarketetatik ateratako ondorio nagusiak azaldu dizkiete. Ondorioez gain, euren proposamenak ere helarazi dizkiete. Orain pilota udalen teilatuan dago, eta alkateek ikasleei idatziz erantzuteko konpromisoa hartu dute.

Haur Hezkuntzatik hasi eta Batxilergora bitarteko ikasleek bakoitzaren adinari egokitutako azterketa egin dute. Hondakin bakoitza zein ontzitara bota behar den ikasi, Gabonen ondoren edukiontzien egoera aztertu, hondakin organikoekin zer gertatzen den ikuskatu, jai ekologikoekin amets egin, erosketa ohiturak eta publizitatearen eragina aztertu edota herrietako enpresen kontsumoa eta hondakinen inguruko jarrerei erreparatu diete.

Legazpiko ikasleek Udalak bultzatu nahi duen Mugikortasun Plana ere ezagutu dute.

Ondorio nagusiak

Lehenengo eta behin, gauza gehiegi erosten direla eta horren ondorioz guztionak diren hondakin gehiegi sortzen direla diote ikasleek. Plastiko eta paper asko dagoela eta erabili bezain pronto botatzen diren produktu ugari dagoela ere ondorioztatu dute. Hondakin organikoekin gogoratu dira, eta konpostajea sustatzea gomendatu dute.

Kontsumoarekin zuzenean lotutako publizitatearen eragina aztertu eta gero, gazteek markak kontuan hartzen dituztela onartu dute, eta publizitateak gauza materialen onura azpimarratu eta bizimodu hobearen irudia saltzen duela argi dute.

Ikasle guztiak bat datoz dendetan poltsa gehiegi banatzen direla esaterakoan, eta supermekatuetan poltsak ordainduta eskuratu beharko liratekeela diote, agian horrela erosleek euren poltsak eramango lituzteketelako.

Eskakizunak

Kontsumo ohiturak arrazionalizatu eta hondakinen kudeaketa hobetzeko zenbait konpromiso hartzeko prest daude ikasleak: publizitatearen aurrean kritikoak izan edota berrerabilpena sustatu. Herritarrei ere zenbait proposamen egin dizkiete, jostailuak trukatzea adibidez. Udalei sentsibilizazio kanpainak egitea, edukiontzi gehiago jartzea, hauteskundeetan publizitatea murriztea eta gai ekologikoak eta bidezko merkataritza bultzatzeko eskatu diete.

Nagusitzean supermerkatura euren poltsak eramaten dituzten helduak badira, bejondeiela!