Goierriko Hitza

Gipuzkoako Foru Aldundiak, Garapen Iraunkorreko Departamentuaren bitartez, ontzat eman du bizikletarien eta oinezkoen bidearen zati hau egiteko proiektua: Gi-2637 errepidearen ondoan, Zeraingo bidegurutzetik Segurako Kortaberria auzorako sarbideraino. Ontzat eman du, era berean, Eusko Jaurlaritzari lanak presakotzat jo ditzan eskatzea, urte bukaeran hasi nahi baitute obrekin.

Aurreikusitako aurrekontua 679.120 eurokoa da, eta lanak egiteko epea lau hilabetekoa, egiten hasten direnetik aurrera kontatuta, urte bukaeran hasiko baitira, desjabetzeko eta enkanteko tramiteak egin ondoren.

Proiektuaren bidez 1.658 metroko bidegorria egingo dute: hasierako 440 metroak errepidetik aparte joango dira, eta gainerako 1.218 metroak Gi-2637 errepidearen ondotik.

Errepidearen zabalera hiru metrokoa izango da, eta oinezkoek nahiz bizikletariek batera ibili ahal izango dute. Dena dela, oinezkoek izango dute lehentasuna, eta bizikletei abiadura orduko 20 kilometrora mugatuko zaie.

Bidegorria egiten elkarlanean ariko dira Bide Azpiegituretako Departamentua eta Garapen Iraunkorreko Departamentua. Lehenengoa lurra berdintzeaz arduratuko da errepidearen parean doan zatian, eta bigarrena bide zorua egiteaz eta azken egokipenaz, errepidetik aparte doan zatiaz gain. Bidegorriko argiteriako kanalizazioak ere egingo dituzte.