Goierriko Hitza

Asko gaiztotu da egoera duela urtebete udala osatzeko herriko bi alderdien arteko akordioa aurkeztu zutenetik hona. Duela hilabete inguru, Zaldibiako Aralarrek bosgarren zinegotzia hartzea erabaki zuen, etxebizitzen inguruko proiektu bat onartzeko. Orduz geroztik egiten zen aurreneko osoko bilkura deituta zegoen asteazken iluntzerako. Ezker Abertzaleak protestak iragarri zituen, eta batzar aretoan agerian gelditu zen Zaldibian bizi den egoera.

Osoko bilkura hasterako Amaia Etxabe hautetsi baliogabetuak hartu zuen hitza, eta «udaletxe honen osaketa salatzeko» testua irakurri zuen. Bertan azaldu zuenez, «ez dugu onartzen Aralarrek, alderdien legearen kontra omen dagoenak, lege hauetaz baliatuz eta egoera aprobetxatuz Zaldibiako Udalaren osaketa herriari bizkarra emanez aurrera eramatea». Etxabek, emandako hitza ez duela errespetatu leporatu zion Aralarri. «Inoiz ez omen zenuten hartuko herriak eman ez zizuen kargurik. Non gelditu da Aralarren hitza?».

Patxi Aierbek, berriz, «eztabaida antzua» zela erantzun zion, «herriari ezer aportatzen ez diona». Bere hitzetan, «Aralarren jarrera argia eta tinkoa da, eta hala erakusten ari da herriz herri. Baina konflikto gogor honen inguruko eztabaida gure artera ekartzea, suari egurra botatzea da, eta hori ez da ez gure eta ez zuen onerako», adierazi du Aierbek.

Konponbiderik ba ote

Egoera konpontzeko bidean, «oraindik ere garaian» daudela berretsi zuen Etxabek. «Gure proposamena mahai gainean duzue. Ez da berandu, gauzak txukun egite aldera urratsak emango badira».

Aralarreko ordezkarien ustez, ordea, «lehen adostu genituen baldintzak hankaz gora jarri dituzte». Aierbek dioenez, «gu prest gaude hasiera batean adostu genuen horretara itzultzeko. Hau da, bi alderdien artean adostutako herritar bati bosgarren zinegotzi kargua eman eta biok adostutako gaietan bakarrik erabiltzeko. Gainontzean lau eta lau ordezkarirekin funtzionatuko genuke». Aierbek zehaztu duenez, «eurek egin zuten proposamen hura, eta gu erronka horri eusteko prest gaude».

Hautetsi baliogabetuek «herriaren erabakia ukatu eta bere borondatea bahitu» izana leporatu zieten. Etxaberen ustez, «posible da herriaren bozkak errespetatuz udala osatzea. Hori da herriaren eskaera eta Aralarren betebeharra». Horrela gertatuko ez balitz «tinko eta irmo» borrokatuko dutela azaldu zuten. «Ezker abertzaleak herriaren borondateari eusteko konpromisoa du», berretsi zuen, eta horretarako, «herritarrei eskura dituzten bitarteko guztiekin tinko jarraitzeko» deia egin zieten.