Goierriko Hitza

Gipuzkoako Preferenteko sailkapenean lehenengo bukatzen duenak 3. Mailan jokatuko du datorren denboraldian, zuzenean igoko da. Balentria hori lortzeko bidean da Ordizia, atzo Altamiran 3 eta 0 irabazita geroz eta gertuago baitu txartela. Bi jardunaldi soilik geratzen dira liga bukatzeko, eta bigarren dauden Real Union eta Trintxerperi gutxienez hiru puntuko aldea ateratzen segituko du Ordiziak, euren emaitzen zain.

Konfiantzarekin irten ziren ordiziarrak atzo zelaira. Ohi baino lehenago hasi zen partida, 16:00etan, Beasain auzo herrian festak izanda eta jokalari asko hangoak direnez, ospatzera lehenbailehen joateko. Eta aitzakia bikain kunplitu zuten. 4. minuturako aurretik zen Ordizia. Erraz jokatu zuten, hegaletako jokoa egoki eta eraginkor eginez.

Oinak lurrean edukitzeko beharraz ohartarazi du astean zehar Ruben Vazquez entrenatzaileak. Oraindik ez dute lehenengo postua segurtatu, eta goiburu horri kasu egiten jarraitu beharko dute zuzeneko igoera lortzeko. Baina dena aldeko dauka Ordiziak. Datorren asteburuan ere Altamiran jokatuko du, Zumaiakoren kontra. Eta ligako azkeneko partida Donostian, Beriorekin. Etxeko neurketa aurrera ateratzen badu lan erdiak baino gehiago eginak izango ditu, Real Unionekin gol averagea alde duelako, baina ez Trintxerperekin (gaur dute pasaitarrek).

Idiazabalek arnasa hartu du

Kontrako aldean, oraindik iraupena seguru ez duena Idiazabal da. Baina atzo hiru puntuak batu eta arnasa hartzeko moduan da. Eibartarrak taldeari 4 eta 1 irabazi zion, jaitsierako borrokan aurkari zuzenari. Sergio Serranok, Artolak, Urretak eta Harrik sartu zituzten golak, 4 eta 0 jarriz. Erabat menperatu zuten arerioa atzo.