Goierriko Hitza

Junior mailako XXXIV. Gurutze Deunaren txirrindulari proban Gorka Olaizola izan zen lehendabizikoa igandean Seguran. Viveros San Anton taldeko txirrindulariak 2 ordu, 19 minutu eta 8 segundo behar izan zituen ibilbidea bukatzeko, eta ia minutuko aldea atera zion bigarrenari, Aritz Mujikari.

Lasterketa hasieran Andoaingo Txirrindulari Elkarteko bi gaztek lortu zuten ihes egitea. Lasterketa erdia baina gehixeago biek bakarrik egin zuten. Zerainera igotzen ari zirela euren taldeko txirrindulari batek harrapatu zituen lehendabizi, eta ondoren Gorka Olaizolak. Handik aurrera Olaizolak bakarrik egin zituen gainerako kilometroak. Atzetik ziren beste kirolariak eta 56 segundoko aldea atera zion Aritz Mujikari, bigarren sailkatu zen gazteari. Hirugarrenari minutu bat eta sei segundoko aldea kendu zion. Garaje Anaiak-ek emandako garaikurra eraman zuen etxera.

Mendiko saria Olaizolak berak eskuratu zuen eta Ordiziako Amonane Pubak emandako saria etxeratu zuen. Helmugan sartzen lehen herritarra Aritz Agirre izan zen. Ordiziako Aralar Grafikek emandako saria eman zitzaion berari. Agirrek 2 ordu, 21 minutu eta 29 segundo behar izan zituen lana bukatzeko. Sailkapen orokorrean 15. postuan sailkatu zen Caja Ruraleko gaztea, irabazlearengandik 2minutu eta 21 segundora.

Taldeka onena Andoaingo Txirrindulari Elkartea izan zen, bigarrena Lan Mobel eta hirugarrena Bruesa-Policlin. Talde onenak Segurako Santa Barbara karrozeriak eman zion saria.

Lasterketan izena emanda zeuden 50 lagunetik 36k lortu zuten lasterketa bukatzea. Antolatzaileen hitzetan ez zen erorketa eta bestelako arazorik gertatu, «guztia ondo atera zen».

Ikusleak mendate gainetan, Lierniko eta Zeraingo igoeretan eta helmugan pilatu ziren gehienbat. Herritarrak, inguruko herrietatik gerturatutakoak eta txirrindularien senitarteko zein lagunak ziren ikusle.

Antolatzaileen esker ona parte hartzaile eta laguntzaileentzat

Segurako Txirrindulari Elkarteko antolatzaileek esker oneko hitzak dituzte lasterketa antolatzen lagundu duten erakunde, talde, denda eta enpresentzat. Bestalde parte hartzaile eta ikusleei ere eskerrak eman nahi dizkiete «eurak gabe ezingo litzatekeelako lasterketa aurrera eramatea».

 

sailkapena

Sailkapen orokorra.

1. Gorka Olaizola 2:19:08

2. Aritz Mujika 56ra

3. Mikel Elorza 1:06ra

4. Joseba Ubillos 1:17ra

5. Xabier Arnaiz 1:28ra

6. Alain Iglesias 1:28ra

7. Hodei Eneritz 1:28ra

8. Ion Odriozola 1:28ra

9. Aitor Ugalde 1:28ra

10. Aritz Elustondo 1:28ra

11. Ion Iriarte 1:28ra

12. Ibai Daboz 1:28ra

13. Beñat Mendia 1:28ra

14. Iker Bilbao 1:28ra

15. Aritz Agirre 2:21ra



Taldekako sailkapena.

1. Andoaingo 07:01:05

2. Lan Mobel 21era

3. Bruesa-Policlin 43ra

4. Azpiru Inmobili 3:45era

5. Puertas Diproca 5:09ra

Mendiko Saria.

1. Gorka Olaizola

Lehen segurarra.

1. Aritz Agirre 02:21:29