Goierriko Hitza

Datorren ostegunean, maiatzak 15, Andres Urdaneta itsasgizona omentzeko monolitoa jarri eta inauguratuko dute Urdaneta ikastetxean. Urdaneta ikasle eta irakasleek, eta zenbait agintarik hartuko dute parte ekitaldi horretan. Pedro Otxoa Eusko Jaurlaritzako Hezkuntza sailburuordea, Jose Migel Santamaria alkatea, Belen Maiza alkateorde eta Kultura zinegotzia, eta Jose Ramon de Miguel Urdanetaren biografoa izango dira bertan. Ekitaldia 10:00etan hasiko da.

'Fray Andertxo' maskota

Agintariei ohorezko aurreskua dantzatu eta gero inauguratuko dute monolitoa, eta oroitarriaren paperezko kopia bana emango diete. Ikastetxea bisitatzeko baliatuko dute une hori agintariek, eta ikastetxeko telebista gelan saioa egingo dute ikasleek. Otxoa sailburuordeari eta De Miguel historialariari egingo dizkiete galderak.

Urdaneta 500 urtea dela eta hainbat ekintza egiten ari dira urte guztian Urdaneta ikastetxean. Fray Andertxo izeneko maskota ere prestatzen ari dira, eta egunerako prest badago, maskota bana oparituko diete agintariei. Urteurrenaren harira logotipo lehiaketa egin dute, logotipo horiek ikusgai jarri dituzte Delikatuzen, Urdanetari buruzko erakusketan izan dira Barrenan, atletismo proba ere antolatu dute eta hainbat telebista saio eta irratsaioa egin dituzte urtean zehar.