Goierriko Hitza

Goierri ðð San Isidro eguna ospatuko dute ostegunean Goierriko hainbat herritan. Baserritarren egunean ez da ekitaldirik faltako.

Bizimodu gogorra da baserritarrena. Egunak argitzen duenetik eguzkia sartu arte, egun osoa pasatzen dute lanean. Baratzean, belarretan, ganaduarekin... ez dute lan faltarik izaten. Baina dena ez da lana izango, eta San Isidro eguna iristen denean, eurentzako tarte bat hartu eta festa egiten dute. Izan ere, baserritarren eguna ospatzen da Goierriko herri eta auzo askotan.

Aurten ere ez dira gutxiago izango, eta nonahi dago lagunarteko bazkari edo afariren bat egiteko aukera, etzi. Aspaldiko ohitura da San Isidro egunekoa, eta herri gehienetan ekitaldiak ere klasikoak izaten dira, elizakoak eta mahai inguruko ospakizunak egiten baitituzte. Berezitasunik ere izaten da ordea Goierriko eskualdeko herri eta auzoetan.

Garai bateko ohitura eta tradizioen testigu da Ormaiztegiko San Isidro eguna. Urtero meza eta afaria egiten dituzte, baina azken horretan ohitura berezi bat mantentzen dute. Izan ere, baserritarren arteko afarira herriko alkatea eta apaiza gonbidatzen dituzte urtero.

Seguran, berriz, ardoa banatzeko ohitura dute San Isidro egunean. Aurrena santuaren izen bera daraman pilota txapelketako finalak jokatuko dituzte. Ondoren, plazan bildu eta herritarrek ardoa probatzeko aukera izango dute, Udalaren eskutik.

Barazki eta ziza lehiaketa

Ataungoa da beste berezitasunetako bat. Izan ere, duela urte batzutatik hona herriko barazki eta zizarik onenak saritzeko lehiaketa egiten dute. Gainera festalekua urtez urte auzoz aldatzen joaten da. Aurreko urteetan San Gregorion eta San Martinen egin denez, aurten Aiaren txanda izango da.

Ospakizunik ez da faltako, beraz, baserritarren egunean. Baserritarrek ere badakite festa egiten. Urte guztia lanean eginda gero, mereziko al dute horrenbeste.