Goierriko Hitza

Iganderako eguraldi iragarpenak onegiak ez ziren arren, Iñaki Beitiaren omenezko mendi martxak arrakasta izan zuen mendizaleen artean, eta mila lagunetik gora bildu zituen, 1.108 zehazki. Horietatik gehienak Urretxu-Zumarragakoak ziren, 600 bat, baina baziren 103 Legazpitik etorritakoak eta jende ugari Azkoitia, Tolosa, Donostia, Ormaiztegi, Beasain, Gasteiz eta bestetatik etorriak ere.

Hamar ordu

Goizeko seietan ekin zioten 263 mendizalek ibilbide luzeari. «Edizio honetan gehitu genuen nobedadea Zeraingo eta Mutiloako lurrak bisitatzea zen. Seguruenik gure mendizaleek gutxi ezagututakoak, hain zuzen», diote antolatzaileek. Orokorrean hamar ordu egin zituzten oinez, baina izan ziren denbora gehiago behar izan zutenak ere.

Zortzietan hasita ibilbide laburrari ekin zioten gainontzeko 800 mendizale inguruk. Pagolako lepoan bi ibilbideek bat egin zuten. «Tarteka euria egin bazuen ere eta zenbait bide-zatitan lokatza soberan bazegoen ere, tenperatura ibiltzeko ezin hobea zen, eta seguruenik lasterka ibiltzeko ere bai; korrikalariak uste baino lehenago iritsi ziren helmugara», diote antolatzaileek.

Ezer larririk ez

Urola Garaiko Gurutze Gorria bertan izan zen, eta irrist egiteagatik baten batek kolperen bat hartu bazuen ere, ez zen aparteko ezbeharrik gertatu.

Dena den, iristerakoan partehartzaileek esandakoaren arabera, aurtengo edizioa gogorrenetarikoa izan da. Jan-edan postuetan «Beitia Bull bizkogarria jarri eta atseginez hartu zuten», diote antolatzaileek umorez.

Galdutako zeinbait gauza Ostadarren egoitzan daude. Mecano izeneko zakur eme zuri-marroia galdu dela ere bai, Leturia baserriaren inguruan. Laguntza lanetan aritu ziren 80 lagunei zein mendizaleei eskerrak eman dizkiete antolatzaileek: «Horrela bizirik mantendu dugu beste urtebetez Iñaki gure memorian».