Goierriko Hitza

Urretxuko udal gobernuak logotipo berri bat aukeratu nahi du herriaren irudia izan dadin. «Orain arte armarria izan da herriaren irudia eta bertan Jainkoa bakarrik aintzat eta ohore dio, gaurko egunekin ez dator bat», adierazi du Iñaki Zabala alkateak. Logotipo berria aurkitzeko ideien lehiaketa abian jarri du Udalak.

Logotipo berria Urretxuko irudiaren eramaile izango da. Publizitate ofizialean, udal ibilgailuetan, komunikazioan eta argitalpenetan ipiniko dute. «Azken batean, irudiak herriari buruz eman nahi dugun informazioa trasmititu beharko du».

Udaletik logotipo lehiaketa horretan ahalik eta parte-hartze handiena egotea nahi dute. Lehiaketan edozeinek parte har dezake, gehienez hiru lan aurkeztuz. Logotipoan Urretxu hitza agertu beharko da idatzita.

1.500 euroko saria

Lehiaketara lanak aurkezteko epea ekainaren 18an bukatuko da, 15:00ak baino lehen udaletxeko erregistro nagusian. Ebazpena sanjoanetarako izango dutela espero dute. Sari bakarra emango dute, 1.500 eurokoa.

Ikasleen artean lehiaketari lotutako sariketa bat bultzatuko dute, herria nola ikusten duten jakiteko; gaztetxoen logotipoak ere sarituko dituzte.