Goierriko Hitza

«Orain ordubete inguru ailegatu gara beheko kanpalekura, Makalu gainera igotzeko lehen tentaldia egin eta gero. Aurrenekoan ez da posible izan». Koke Lasa mendizaleak GOIERRIKO HITZAri Himalayako Makalu mendiaren (8.463 metro) beheko kanpalekutik atzo arratsaldeko lehen orduan egindako adierazpenak dira horiek. Ander Goitia eta biek egin dute Makalura igotzeko aurreneko saiakera, baina ezin izan dute gailurreraino igo. Ez ditu zehaztu ahalegin hutsal horren arrazoiak. «Bost sei egun generamatzan 7.000-8.000 metro artean, eta behera jaistea erabaki dugu».

Berriz ere gora egiten saiatuko ote diren galdetuta, Lasak adierazi du lehendabizi atseden hartuko dutela «lau bat egunez», eta gero beste «tentaldi» bat egingo dutela. «Dendak jarrita dauzkagu goiko puntuetan, eta bertan janaria ere utzi dugu. Hori abantaila da hurrengo saiakera egiteko».

«Ez da nire urtea»

Pedro Garcia beheko kanpalekuan zuten zain, urdaileko ondoezetik osatzen. «Aurten ez da nire urtea. Aklimatatzen ari ginela ondoeza jarri eta botaka aritu nintzen, eta orkatila bat ere bihurritu nuen», esan du ordiziarrak. Dagoeneko osatu da, eta bihar bertan egingo du ahalegina. «Blanca nafarrarekin eta Jordi kataluniarrarekin abiatuko naiz gora». Gainerantzean, denak ondo daudela adierazi du Garciak.