Goierriko Hitza

Aurreko asteburuan mus txapelketa jokatu bazen ere, Eitzagako festak bihar hasiko dira bete-betean, auzotarrek osatutako Jai Batzordeak antolatuta.

Ohi bezala programa zabala jarri dute. Bihar, San Isidro eguna, meza eta ondoren jubilatuentzat hamaiketakoa izango dira. Dena den, adin guztietako jendearentzat pentsatutako jaiak direnez, arratsaldean buruhandiak, poteo herrikoia eta Gorritiren animaliak izango dira, eta indarrak berreskuratzeko txistor jana.

Berritasunak

Nobedadeak ere sartu dituzte egitarauan. «Aurten ostiral arratsaldeko poteoa El Orfeon de la Castaña de Gaztelubide taldeak girotuko du. Taldea Donostiako Orfeoitik pasatutako hainbat pertsonak osatzen dute», azaldu dute Eitzagako jaien antolatzaileek.

Larunbat arratsaldeko ekitaldiei dagokienez, hegazti harraparien erakusketa izango da 18:45ean hasita 20:45a arte. Bestalde, dagoeneko usadio bihurtu den Karmakros antzerki taldearen emanaldia ere ikusi ahalko da. Igandean lana estreinatuko dute, Tarde de Toro izenburupean. Horrekin batera musika, afari herrikoia, herri kirolak eta Eitzagako festek berezkoa duten kaleko giroak osatuko dute asteburu luzea.

Larunbatean aurten 25. edizioa ospatzen duen Kros Herrikoia jokatuko da, eta auzoko kaleetan barrena ibiliko dira korrikalariak.

Dantzari Txiki eguna, Eitzagan

Igandean, azkenik, Dantzari Txiki eguna ospatuko da Zumarragan, Irrintzi taldeak antolatuta. Goizean dantzarien emanaldiak herriko kaleetan egingo badituzte ere, ekitaldi nagusiak Eitzagan izango dira, bai goizean, bai arratsaldean. Korosti, Sustraiak, Lurra, Oin-Arin, Goruntz, Itsasi eta Irrintzi taldeek hartuko dute parte.