Goierriko Hitza

Energia, industria, itsasogintza, burdinbide sare eta ingurumenaren arloetan lan egiten duen Ingeteam enpresak entseguetarako eta esperimentaziorako zentroa jarriko du Beasainen. Zentroa erakitze fasean dago, eta Ingeteam-eko kide den Indar enpresaren aldamenean egingo dute. 2009. urte bukaerarako martxan egotea espero dute arduradunek.

Laborategiaren aurkezpena atzo egin zuten Zamudioko (Bizkaia) Parke Teknologikoan, Beasainen ez ezik han ere beste zentro bat zabalduko dutelako. Zamudiokoa elektronikara zuzenduta egongo da. Beasaingoa baino zentro handiagoa izango da Zamudiokoa, egoitza nagusia han izango duelako.

Ingeteam-en Beasaingo zentroak 1.300 metro koadro izango ditu eta 30 langile ariko dira, atzo eman zituzten datuen arabera. Zamudiokoak, berriz, 170 langile izango ditu.

Bi lan arlo

Ingeteam-eko arduradunen arabera laborategiak aitzindaria izango dira Espainiako estatuan, lehena izango da, eta nabarmendu dutenez, «munduan ezaugarri horietako beste lau zentro bakarrik daude». Inbertsio osoa 17 milioi eurokoa dela esan dute.

Beasainen egingo duten laborategian potentzia altuko makina elektrikoak landuko dituzte, ikerketari begira batez ere: potentziaren garraiobideak, potentzia bilakatzaileak, makina elektriko errotatiboen diseinua eta eraikuntza, analisi termikoa eta magnetismoa, hozte teknikak airez eta urez, zaratak, bibrazioak...

Ingeteam enpresa

Ingeteam-en baita 28 enpresa kide daude, 15 nazioarteko herrialdeetakoak, 3.000 langiletik gora, eta enpresaburuen arabera urteroko salmentek 500 milioi euro baino gehiagokoak dira.