Goierriko Hitza

Euskadiko Abere-Ustialekuen VIII. Txapelketaren sari banaketa egin zuten atzo Liernin. Guztira hamabi sari eman zituzten, hiru Euskal Autonomi Erkidegoaren mailan eta bederatzi Gipuzkoa, Bizkaia eta Arabarako bereizita. Sariak jaso zituzten abeltzainen artean bi goierritar daude, Ordiziako Arramendi Kooperatiba eta Jabier Muñoa zeraindarra. Ordiziakoak EAE mailan eta ardien atalean jaso zuen saria, 1.500 euro eta garaikurra. Zeraindarrak Gipuzkoa mailan, ardien atalean, 1.000 euro eta garaikurra etxeratu zituen.

Aurtengo txapelketan 353 ustialekuk parte hartu dute. Horietatik 121 gipuzkoarrak dira, 138 bizkaitarrak eta 94 arabarrak. Txapelketaren helburua abere-ustialekuen berritze teknologikoan laguntzea da. Beraien maila tekniko eta ekonomikoagatik nabarmentzen diren ustialekuez gain, euren produkzio-metodoak baliabideen kudeaketa iraunkorra bermatzera bideratzen dituztenak ere saritu nahi izan dituzte antolatzaileek, Eusko Jaurlaritzak, hiru lurralde historikoetako foru aldundiek, hiru lurraldeetako gestio-zentroak eta Neikerrek.

Aurtengo txapelketa antolatzea Gipuzkoako Foru Aldundiari zegokion, eta sari banaketa ekitaldian ziren besteak beste, Markel Olano diputatu nagusia, Gonzalo Saenz de Samaniego Eusko Jaurlaritzako Nekazaritza, Arrantza eta Elikadura sailburua eta Rafael Uribarren Landa Ingurunearen Garapeneko foru diputatua.

Sariak banatu ondoren bazkaria egin zuten Lierniko Mujika jatetxean.

Erakustaldia ez zen egin

Sari banaketaren aurretik, belarkien erabilera eta kontserbaziorako makinariarekin erakustaldia egitekoak ziren Zerainen, Oiarte landetxearen inguruan. Euria eginda zegoen ordea, eta zelaia bustiegia egoteagatik bertan behera utzi zuten erakustaldia. Makinak, dena den, jarri zituzten jendeak ikusi zitzan eta adituei azalpenak eskatzen ere aritu zen jendea.

Oiarten hamaiketakoa zerbitzatu zuten bertaratutako guztientzako. Almitza sega elkartearen eskutik erakustaldia ikusi ahal izan zen gero, nazioarteko eran. Emakumezkoetan Maria Luisa Gabirondo, Arrate Garin eta Ainhoa Ansa aritu ziren txanda bakarrean. Gabirondo gailendu zen 2minutu eta 27 segundoko denborarekin. Bigarren postua Garinentzat izan zen eta hirugarrena Ansarentzat.

Gizonezkoetan Migel Mari Jauregi Altzo, Joxe Gabirondo, Bixente Mitxelena, Juan Mari Agirrezabala, Jexux Mari Lasa eta Jon Kanflanka lehiatu ziren, bi txandatan. Jauregi izan zen lana bukatzen lehena 3 minutu eta 47 segundoko denborarekin. Bigarren Gabirondok egin zuen eta hirugarren Mitxelenak.

Sega erakustaldiaren ondoren Zeraingo pilotalekuan aizkora saioak erakarri zuen arreta. Migel Mari Jauregik eta Jexux Mari Lasak, Xabi Dorronsoro eta Arkaitz Jauregi izan zituzten aurkari, bikoteka. 60 ontzako bi enbor eta kanaerdiko lau ebaki behar izan zituzten. Gazteek aurre hartu zieten helduei.

sarituak

«Makina horiei esker askoz ere neke gutxiago izaten da eta, beraz, errazago lan egiten dugu»

jabier Muñoa ð- Ardi ustialekuetan Gipuzkoako saritua

Zerain

Banatutako hamabi sarietatik bat Jabier Muñoa zeraindarrak jaso du ardien atalean: 1.000 euro eta garaikurra.

e. imaz

Jabier Muñoa zeraindarra da saria jaso duenetako bat. 500 ardi ditu berak, eta ustiategian teknologia aurreratua erabiltzen du lana errazteko.

Nola hartu duzu saria?

Oso pozik nago, gainera saria herrian bertan jasota oraindik gusturago sentitzen naiz.

Lehiaketaren helburua abere ustialekuen berritze teknologikoan laguntzea da. Uste duzu helburua betetzen dela?

Bai, nik uste dut baietz. Genetikan eta makinarietako teknologian inbertitu izana baloratzen edo puntuatzen dute.

Ustialekuko hainbat ezaugarri puntuatzen dituzte saria emateko garaian. Nolakoa da zure ustialekua ezaugarri horiei dagokienez?

Nik 500 ardi dauzkat eta ardi horientzako ikuilu bat dut prestatuta. Bertan jana emateko makina batzuk dauzkat jarrita, modu automatikoan egiten dute ia lan guztia. Esnea jezteko ere makina automatiko bat dut. Lehen esnea jezteko makina mekanikoa neukan, baina iaz erretiratu egin nuen eta makina automatikoa jarri nuen. Balore bat sartu genuen hor eta nahiko ongi joan zaigu. Gero, gaztagintzan aritzeko ere teknologikoki nahikoa aurreratuta dauden makinak dauzkat jarrita.

Teknologia aurreratuak abaintailak soilik ematen ditu edo buruhausteak ere bai?

Ematen ditu buruhausteak ere, egia esateko. Zuk modu horretako makinak jartzen badituzu ikastaroak egin behar dituzu nola funtzionatzen duten ikasteko. Hori ez da makina zahar bat ekarri eta martxan jartzea bezala, baina gero abantaila handiak ere ematen dituzte, zalantzarik gabe.

Abere ustialekuetan teknologia aurreratua erabiltzea aholkatuko al zenieke gainerako abeltzainei?

Bai, nik neuk ezagutu izan dut lan egiteko lehengo modua. Lehen lan asko eskuz egiten zen. Orain makina asko dago eurekin lan egiteko modukoak. Askoz ere neke gutxiago izaten da eta, beraz, errezago lan egiten dugu. Produktibitatean ere hobekuntza gehiago izaten da.

Bizi kalitatean bertan ere eragina izango du ezta?

Bai, badu bai, lan aldetik neke gutxiago izaten da makina horiei esker. Dena den, gure lanbidea oso lotua da.

Zuk zure ustialekuan beste makinaren bat sartzeko asmorik ba al duzu, edo orain dituzunekin planto egingo duzu?

Ez, ez. Gauza batek bestea eskatzen du. Ardiekin hasi nintzen, baina gero gaztagintzarako ere ekarri nituen. Hobetzeko eta ordu gutxiago lan egiteko bada...

Zein makina ekarriko duzu?

Animalien elikadura errazteko makina bat ekarri nahiko nuke. Zinta bat daukat, automatikoa, baina hari jana emateko makina bat sartzea da asmoa. Espainia mailan ez dago horrelakorik, baina Europan bai.

 

 

Jasotako erantzunak:

Mezua idatzi

1

Patxi | 2008-05-17

Aupa Joxeramon: Pertsona zintzoa, zuhurra eta leiala. Artzain bikaina eta behizale amorratua. ZORIONAK. Besarkada bat Matias eta Mariajesus-eri.

Parte hartu | Zure mezua bidali

Izena:

e-posta:

Izenburua:

Mezua:

Aurreko kodea kopiatu:

Parte hartzeko arauak

1. 1. - Saiatu zure artikuluak izen-abizenekin sinatzen. Indar handiagoa du.
2. 2. - Iritzia anonimoki eman nahi baduzu, baduzu horretarako aukera ere. Kontuan hartu ondokoak:
   * Ez pertsonala. Pertsona bati buruz ari garenean zehazki, kritikatzeko edo famatzeko, anonimoek ez dute balio. Eta, kasu honetan, pertsona fisikoez ari gara, ez entitate juridikoez.
   * Entitate juridikoez anonimoki aritu daiteke, baina pertsonalizatu gabe, eta talante eta errespetu onean; iraindu gabe, doako akusaziorik egin gabe... errespetuan.
   * Aurreko gauza bera gai orokorrez idatzi behar denean ere.
   * Norbaitek pertsonalki sinatutako iritzi bati, pertsonalki erantzutea dagokio, eta ez anonimoki.
3. 3. - Dena arautzea ezinezkoa da, batez ere hau bezalako webgune batean. Mesedez, denon zentzu ona eta kolaborazioa eskatzen ditugu. Apenas izango den logika bezalako arautzaile zuzenik kasu hauetan.