Goierriko Hitza

Lazkao ðð Rwanda elkarteak eta Lazkaoko San Benito ikastolak, Elkartasun Astea antolatu dute; datozen egunetan, hainbat ekintza izango dira, tartean giza katea edota elkartasun festa.

Badira urte batzuk Lazkaoko Rwanda elkartea, herritarren artean sentsibiliazazioa eta elkartasuna bezalako baloreak bultzatzeko lanean hasi zela. Bide horretan, bidaide bat topatu zuten, San Benito ikastola, eta elkarren artean, hainbat ekintza antolatzen dituzte urtean zehar. Egunotan ospatuko den Elkartasun Astea da hauetako bat.

Bihar hasita, San Benitoko ikasleek, «elkartasuna eta hirugarren munduko arazoen berri eta kontzientziaziaon lan egingo dute». Baina kontzientziazioaz gain, elkartasun proiektu bat laguntzeko helburua ere badu Elkartasun Aste honek. Hain zuzen ere, Ruandako Gihara herriko eskolan, hiru ikasgela egin dituzte lortutako diruarekin. Duela urte batzuk hasi ziren Ruandako herri honetan elkartasun proiektuak bultzatzen, eta aurtengoa, zazpigarren urtea izango da.

Ekintzaz betetako astea

Aste osorako egitaraua antolatu dute, eta egunero izango dira ekitaldiak. Hala, bihar goizean, elkartasun ipuinak eta musika entzungo dituzte. Ondoren, Fernando Rojoren hitzaldia izango da DBHko ikasleentzat.

Asteazkenean berriz, elkartasun jokoak eta giza-katea egingo dituzte haurrek. Kooperazio jokoak eta ipuinak ere izango dira ostegunean. Emaus erakundearen eskutik, bidezko merkataritza produktuak ere jarriko dituzte.

Asteari bukaera emateko, Elkartasun Festa egingo dute San Prudentzioko patioan. Ikastolako ikasleek eurek prestatutako ikuskizuna eskainiko dute guraso eta herritarrentzat.