Goierriko Hitza

Euskal Herriko argazkilari onenetako batzuk bilduko dira asteburuan Beasainen, Argizaiola lehiaketako sari-banaketan. Aurten urteroko ekitaldia Beasainen egitea erabaki du Euskal Herriko Argazkilari Taldeen elkarteak, elkartea sortu zenetik aurreneko aldiz, eta Beasaingo Argizpi argazki taldea arduratu da antolaketaz.

Ekimenari hasiera emateko larunbat goizeko bederatzietan Iturralde plazan harrera egingo diete elkarteko kideei, eta Argizaiola 2007 izenburupeko erakusketa inauguratuko dute ondoren. Jarraian, hamarrak inguruan, udaletxerako bidea hartuko dute, han ekitaldia egiteko.

Beasain ezagutuz

Igartzako monumentu multzora bisita ere egingo dute, hango ondarea ezagutzeko. Artzaienea jatetxean bazkalduko dute denek elkarrekin. Bazkaria bukatutakoan Joseju Gurrutxagari eta Asier Castrori Espainiako Argazkilarien Federazioaren aldetik sariak emango dizkiete, eta Argizaiola 2008 lehiaketako saridunen izenak emango dituzte jakitera gero.

Batzarrean, sariak banatzeaz gain, urteko kontuak aurkeztuko dituzte, eta baita datorren urterako aurrekontua ere, egindako ekintzen zerrenda aztertuko da eta etorkizunerako antolatu direnak aurkeztuko dira.

Argizaiola lehiaketaz

Txapelketen arteko txapelketa da Argizaiola lehiaketa. Euskal Herrian antolatzen diren bederatzi argazki txapelketatakoren batean saridun izan beharra dago aldez aurretik bertara aurkeztu ahal izateko. Sarituen saria da, horrenbestez.

Lehiaketako argazkiekin CDa ateratzen dute urtero, eta aurten ere kaleratuko dute. CDarekin batera erakusketa ibiltari baten bitartez herriz herri Argizaiola lehiaketara aurkeztutako argazki sorta eramango dute. Argazkilari bakoitzaren argazki bat aukeratzen dute erakusketan jartzeko. Euskal Herriko Argazkilari Federakuntzak horretarako tokian tokiko bazkideen laguntza izaten du. Argazkilarien elkartea legez sorturiko kultura elkartea da. Bertako partaide dira Euskal Herriko taldeak, elkarteak eta lagunarteak; tartean baita Beasaingo Argizpi elkartea ere, aurtengo batzarraren antolatzailea dena.

Helburuak

Federakuntzaren helburu nagusiak ondorengoak dira: argazkilari elkarte desberdinen arteko loturak indartzea; argazki lehiaketen egunean egunekoak zuzenak izan daitezen irizpideak eragitea; argazkilaritza eta argazkizaletasuna Euskal Herrian sustatzea; eta nazio mailako nahiz nazioarteko argazki ekintzak antolatzea.