Goierriko Hitza

Lazkao ðð Aurreneko aldiz 2000. urtean antolatu zenetik, San Benito ikastolako lan-talde bat arduratzen da Elkartasun Asteko prestakuntzez.

Elkartasun Astea 2000. urtean hasi zen antolatzen Lazkaon. Hasieran Elkartasun Jaialdia bakarrik egiten zen, Gabonetako egitarauaren baitan. Plazan, frontoian eta ikastetxean egin izan da jaialdia; gero ikasturte amaierara pasa zen, aparteko ekitaldi bezala bereiztu nahian.

Rwanda Elkarteak Gihara izeneko Ruandako herriari laguntzeko ekintza desberdinak antolatu izan ditu azken urteotan, eta ikastolarengana jo zuten beraien helburuak aurrera eraman ahal izateko talde lanean. Gihara eta San Benito ikastolaren harremana sortu zen. Giharako eskolako zuzendari Makelle Mukazitonirekin harremanetan dihardute urtean zehar eta ikastolak ere proiektuan parte hartzen du.

Urte batzuetara, proiektu horren inguruan beste ekintza batzuk ere bil zitezkeela ikusi zen, helburuak hobeto beteko zirela, eta aste osoa antolatzen hasi ginen: antzerkiak, erakusketak, jolas internazionalak, hitzaldiak, kontzientziatze eztabaidak, diapositiba emanaldiak... Gainera Udalak ere diru laguntzak bideratu eta bitartekari lanak bete ditu: Elkartasun Asteko kartelak prestatu, aulkiak jarri, oholtza muntatu, Rwanda Elkartearen proiektua bultzatu... Eta, horrez gain, urtean zehar ikastolan Gabonetan eta Santa Ageda egunean eginiko kantaldietan ateratako dirua ere Giharara bidaltzen da Rwanda Elkartearen bitartez.

Helburu nagusiak

Helburu nagusia herrialde horretan sortzen ziren behar desberdinei erantzutea da, ahal den neurrian, eta herrian kontzientziatze maila bat lortzea, solidaritatearen, gizarte desberdintasunen eta errespetuaren inguruan. Aurten Giharako herrian gela berria eraikitzeko erabiliko da bidaliko den diru laguntza, egiten diren ekitaldietan borondatea eskatuko baita.

Urtean zehar gure lanetan eta gure bizitzetan nahiko murgilduta egoten gara, eta aste honekin nolabaiteko geldialditxo bat egitea eskatzen da, munduan dauden desberdintasunen inguruan pentsatzeko eta kontzientziatzeko. Kontzientziatzeak beharra duten herrialdeei laguntzeko zerbait egitea dakar, eta horretan adinak ez duela zer ikusirik pentsatzen dugu. Haurrek, gazteek, helduek eta zaharragoek parte hartu eta lagundu dezakete modu desberdinetan.

Ikastolaren aldetik, curriculumak berak eta giza etikak bultzaturik, ez zuen dudarik egin proiektu honetan sartzeko, araudian agertzen denez, gure hezkuntzaren helburu nagusienetakoa geroko gizartea baloreetan heztea baita. Balore hauen barruan, besteekiko errespetua, solidaritatea, munduaren desberdintasunen aurrean bizitzeko kultura edo jarrera berri bat lantzea... egongo lirateke.

Azken batean, gizarte honetako eragile desberdinen artean mundu hobe eta berdinago bat eraikitzea litzake neurri handi batean helburua. Gure laguntza emateko modu xumea litzake Elkartasun Astea. Baina, nork edo zer gizartek lagundu behar dio zeini? Guk haiei, haiek guri...Talde lan on batean datza arrakastak.