Goierriko Hitza

Ordizia ðð Euskara Biziberritzeko Plan Nagusiak dagoeneko badu logoa: 'EBPN 2008-2012 euskara, erabili, elikatu'. Zortzi lan aurkeztu dituzte lehiaketara, eta Azpeitiko Eregi komunikazio enpresak irabazi du.

Euskararen erabilera bultzatzea da Ordiziako Euskara Biziberritzeko Plan Nagusiak (EBPN) 2008-2012 urteetarako duen helbururik behinena, euskararen ezagutza eta elikadura ahaztu gabe . Helburu hori islatuko duen irudia eta leloa lortzeko logotipo eta lelo lehiaketa deitu zuen Ordiziako Udaleko Euskara Zerbitzuak aurreko apirilean. Zortzi lan aurkeztu dituzte denera, eta horien artetik, Azpeitiko Eregi Euskara eta Komunikazio enpresaren lana aukeratu du epaimahaiak: EBPN 2008-2012 euskara erabili, ezagutu, elikatu.

Epaimahaiaren iritziz, Eregin enpresaren lanak «ondo» islatzen du EBPNren helburua, euskararen erabilera sustatzea. «Hori ez ezik, aintzat hartu ditugu aurkeztu duten proposamen grafikoaren kalitatea eta berrikuntza, eta baita euskarri desberdinetan erabiltzeko duen funtzionaltasuna ere».

Eregi enpresako Leire Larrañga eta Iñaki Martinez, eta Garbiñe Mendizabal euskara teknikaria eta Belen Maiza Udaleko euskara zinegotzia izan ziren atzoko ekitaldian. Larrañagaren esanetan, enpresek eta erakundeek euskara eta komunikazio arloan dituzten zailtasunez eta beharrez jabetuta sortutako enpresa da Eregi. Lehiaketaren berri izan zutenean, bi aldiz pentsatu gabe erabaki zuten aurkeztea, haien enpresaren jarduerari lotzen zitzaiolako.

Euskaraz hitz egiteko deia

Maizaren iritziz, hizkuntzak gizarte guztiaren altxor izateaz gain, komunikazio-tresna dira, eta erabiltzen diren neurrian, «komunikaziorako gaitasuna eta biziraupena erakutsi eta ziurtatzen dute». Gaztelera eta euskara hizkuntza ofizialak izanagatik, euskaraz bizi nahi duten herritarrek ez dituztela erdaldunek dituzten aukera berak uste du. «Hizkuntzarik ahulena izanda, euskara sustatzeari eta indartzeari ekin behar diogu, instituzioen aldetik ez ezik, hiztunen aldetik ere», nabarmendu du.