Goierriko Hitza

Aurten 30 urte beteko ditu Legorretako Herri Krosak. 1979. urtean aurreneko proba egin zutenetik lasterketa sustraitu egin da herrian, eta gaur egun ehundik gora lagun ateratzen dira korrika urtero; iaz, esaterako, 152 lagunek parte hartu zuten, 142 gizonek eta 10 emakumek.

Proba herrikoia izaki, garaipenak eta markek baino garrantzia handiagoa dute parte-hartzeak eta lagunarteko giroak. Adin guztietako korrikalariak atera ohi dira, batzuk aurrealdean ibiltzeko asmoarekin, baina gehienak helburu proba bukatzea dutenak. Guztira 7,5 kilometroko luzera du Herri Krosak, herrian barrena egiten duten zirkuituan.

Nahiz eta denborari ez zaion halako garrantzirik ematen, bada urtez urte bere marka hobetzen ahalegintzen denik ere. Xabier Miranda lazkaotarra izan da azken bi urteetako irabazlea, eta denborarik onena, 23 minutu eta 59 segundoan. Aurrena helmugaratzen diren korrikalarientzat ez ezik, parte-hartzaile guztien artean zozkatzeko sariak ere izango dira.

Larunbateko proban helduen aurretik umeek hartuko dute korrikarako tartea. 10:30ean hasiko da gaztetxoen proba, eta helduena 11:30ean. Sariak eguerdiko ordubatean banatuko dituzte.

Lasterketa dela-eta herriko trafikoa eten egingo dute ibilgailuentzat, 11:30etik 12:30era bitartean.

Ekitaldiak aurretik eta ondoren

Korpus egunaren inguruan, beste hainbat ekitaldi ere antolatu dituzte Legorretan. Gaur arratsaldeko zazpietan, Musika Eskolako ikasleen kontzertua izango da herri zineman.

Bihar, berriz, arratsalde partean hasiko dituzte festa giroko ekitaldiak. 18:00etan, ardo dastatze txapelketa egingo dute, eta ondoren, herritarren artean banatuko dute ardoa. Merienda izango da segidan, txarangak lagunduta.

Eguna bukatzeko, 23:00etan hasita, Urko Menaia kantarik euskal abestien sorta eskainiko du, jendeak berarekin kanta dezan.