Goierriko Hitza

Udako ikastaroak antolatu ditu Legazpiko Udalak aurtengo oporretarako. Uztailean izango dira urtero bezala, eta ikastaroen helburua «opor garaian eta opor giroan haurren artean euskararen erabilera bultzatu eta indartzea» da, udaletxetik dioten arabera. Izena emateko epea maiatzaren 30era arte egongo da zabalik, eta ikastetxeetan daude matrikula-orriak.

Eskolaz kanpo haurren arteko harremanetan euskararen erabilera handitzea helburu izanik, bi eta bederatzi urte bitarteko haurrek eman ahal izango dute izena.

Udalekuak uztailaren 1etik 24ra bitartean iraungo du eta 09:30etik 12:30era hartuko dituzte haurrak, egunero. Haur Hezkuntzako lehenengo mailako haurrak (2-3 urte) Latxartegin izango dira, bigarren eta hirugarren mailakoak (4-5) Domingo Agirre ikastetxean. Lehen Hezkuntzako lehen, bigarren eta hirugarren mailetakoak Domingo Agirre eskolan bilduko dira.

Matrikularen zenbatekoa

Seme-alaba bakarragatik 30 euroko matrikula ordaindu beharko dute gurasoek, bigarrenagatik 15 euro, eta hirugarrenetik aurrera doan izango da.

Matrikularen dirua ez da ikastetxean ordaindu beharko. Udalak zenbatekoa familia bakoitzari matrikula-orrian ipintzen duten kontu korronte zenbakitik kobratuko dio. Iaz emandako kontu korronte zenbaki bera bada, ez da zenbakia berriz eman beharrik.

Izen-emate epea igaro eta gero ez dituzte haur gehiago onartuko, epez kanpo izena ematen duten haurrak egokitzen zaizkion taldeetan tokirik badago soilik onartuko dituzte.

Ikastaroa hasi aurretik bilera informatiboak egingo dituzte gurasoekin. Informazio gehiago nahi izanez gero udaletxeko euskara zerbitzura jo daiteke.

Begiraleak

Uda ikastaroetan begirale izan nahi duten gazteek ere izena eman dezakete, maiatzaren 30era bitartean horiek ere. 18 urtetik gorakoak eta legazpiarrak izan behar dute nahitaez. Euskaraz ondo jakin eta hitz egin beharko dute.

Baloratuko dutena, besteak beste, aisialdiko zuzendari titulua , begirale titulua eta EGA edukitzea da. Izena udaletxean eman behar da, horretarako NAren fotokopia eta tituluen frogagiriak eraman beharko dituzte.

Begiraleek prestakuntza ikastaroa egin beharko dute, nahitaez, ekainaren 14an.