Goierriko Hitza

Onenetan onenak izan dira Beasaingoak. Eurokopa irabazi dute Suitzan futbol 7ko Zuma GH taldekoek. Finala Suediaren aurka larunbatean jokatu zuten, 2 eta 0 irabaziz. «Ikaragarria izan da», zioen atzo Koldo Zaldua taldekideak, artean bidaian zirela, etxerako bueltan autobusez.

Futbol 7ko jokalariak lehengo astean Eurokopa jokatzera Suitzara joan ziren. Guztira zazpi selekzio lehiatu dira, eta Beasaingoek Espainiako selekzioa ordezkatu dute. Europako zazpiko futboleko talde onenak elkartu dira Suitzan, UEFAk antolatutako Eurokopa jokatzeko. Selekzio hauek jokatu dute Kopa: Suitza, Italia, Herbehereak, Suedia, Austria, Alemania, Frantzia eta Espainia.

Indarrez hasi ziren

Txapelketako lehenengo partida ostiralean jokatu zuten Italiaren aurka. Indarrez hasi ziren. Beasaingo taldea 4 eta 0 hasi zen partida irabazten, baina aurkariek buelta eman zioten neurketari eta azkenean partidaren bukaeran emaitza berdinketa izan zen, launa. Koldo Zalduaren esanetan, «gertaera hark zer pentsatua eman zigun, eta kezkatu ere egin ginen. Baina azpimarragarria da jokatu genituen hurrengo lau neurketetan gol bat bera ez zigutela sartu».

Bigarren partida ostiral arratsaldean jokatu zuten Suitzaren kontra, 2 eta 0 irabaziz. Larunbatean Alemaniaren kontra aritzea egokitu zitzaien, eta haiei ere irabazi egin zieten (1-0), garaipenarekin finalerdietara pasatzeko txartela lortuz. Finalerdietan Frantziari gol sorta sartu zioten, 5 eta 0.

Finala larunbat arratsaldean izan zen. Zuma GH taldeko Jakes Gibelaldek eta Iker Ramirezek gol bana sartu zituzten, futbol zazpiko taldea Eurokopako txapeldun izendatu zituenak, 2 eta 0eko emaitzaren ondotik.

«Adinez zaharrenak ginen»

Suitzara abiatu aurretik taldekideek Eurokopan zer maila aurkituko zuten ez zekitela zioten; alegia, zer tamainako aurkariak topatuko zituzten.

Behin txapelketa bukatuta, Frantziako taldearen «maila altua» nabarmendu dute beasaindarrek, eta horrekin batera Italiako taldeaz esan dute lehiakortasun handikoak direla. Hortaz, herrialde horretako taldeez esan ohi dena egia dela ikusi dutela.

Finaleko aurkariak, Suediak, jokalari oso gazteak zituen, Beasaingo taldekoek kontatu dutenez, zelaian korrika asko egiten zutenak. Esperientziak, ordea, irabazi egin zioen gaztetasunari aldi hartan. Bestalde, Zuma GHkoek txapelketako antolaketa goraipatu dute, dena ondo prestatuta zutelako, kontuan hartuta 2.000 metrora dagoen zelaian jokatu zutela.

Espainiako Txapelketa aurki

Jokalariak atzo etxerako bidean ziren, pozik, iritsitakoan ere garaipenaz gozatzeko asmoarekin. Hala ere, laster Madrilen jokatuko den Espainiako Txapelketari begira jarri dira. Txapelketa ekainaren 21ean eta 22an jokatu da. Iaz eurek lortu zuten irabaztea. Aurten helburu berarekin joango dira.