Goierriko Hitza

Abiadura Handiko Trenaren aurkako hainbat kide Ordiziako Mariaratz bailaran egiten ari diren obren eremura sartu ziren igandean, AHTren kontrako jarrera azaldu eta lan horiek «berehala gelditzeko» eskatzeko. Lanen eremuan dagoen etxebizitza baten teilatura igo ziren, eta bi pankarta zintzilikatu ondoren, euren buruak katez lotu zituzten. Obrak gelditu! Lurra ez txikitu! eta AHTrik ez! Ekintza zuzena, desobedientzia zioten pankartek. Ertzaintzak identifikatu eta lan eremutik kanporatu zituen, «kolpeka eta indarrez tiraka».

Ordiziako Zuhaiztitik abiatuta manifestazioa egin zen igande eguerdian. Elkarlanaren arabera 500 lagunek hartu zuten parte bertan. Herriguneari itzuli bat eman ondoren, Mariaratz auzora jaitsi ziren. Ertzaintza han zen ordurako, eta manifestariek ordu erdiko eserialdia egin zuten. Tarte horretan zenbait lagun kateatu egin ziren, eta aldi berean, beste aurkari talde bat lanen eremura sartu eta teilatu gainera igo zen.

Ertzaintzaren esku-hartzea

AHT Geldituren esanetan, obren eremuan kateatu zirenek Ertzaintza «esku-hartze latza» jasan zuten. «Kateak moztu zizkietenean, oraindik eskumuturrak eta orkatilak lotuta zituztela, lurretik arrastaka eraman zituzten kolpeka». Barruan ere tentsio giroa zegoen. Teilatuan zeudenak kanporatu bitartean, beste zenbait lagun menditik obretara sartu zirela dio Elkarlanak, eta horietako batzuk hondeamakinetara kateatu zirela. «Ertzaintzaren jarrera gero eta bortitzagoa izan zen, eta gomazko pilotak jaurti zizkieten menditik protesta egiten ari zirenei». Elkarlanaren arabera 25 lagun inguru identifikatu egin zituzten, eta lagun bat atxilotu ere bai. «Autoritateen aurkako erasoa» egozten diote. Gero aske utzi zuten.

Gelditour ekimen informatiboa ere igandean iritsi zen Goierrira. Itsasondon herri-bazkaria egin zuten. Ekimen hori Donostian bukatuko da, manifestazio batekin.