Goierriko Hitza

Aurrera doa Gipuzkoako Herriarteko Pilota Txapelketa, eta taldeak finalera gerturatzen ari diren heinean gero eta zailagoa da hurrengo faserako txartela lortzea. Dagoeneko eskuzko txapelketa hasi zuten 26 herrietatik zortzi besterik ez dira gelditzen. Ataungo pilotariek pauso garrantzitsua eman dute asteburuan finalaurrekoei begira; joaneko partidan 2 eta 1 hartu dute mendean Lizartzako taldea.

Larunbat goizean jokatu zituzten joaneko partidak Ataungo Auzoeta kiroldegian. Lizartzarrek Zumarraga kanporatu zuten aurreko asteburuan, eta lehia gogorra espero zitekeen. Ataungo zaletuek ere ondo erantzun zuten, eta jende ugari bildu zen Auzoeta kiroldegiko harmailetan.

Kadeteen mailan Ataunek ez zuten arazo handirik izan lizartzarrak mendean hartzeko. 22 eta 10 irabazi zuten aurreneko partida. Bigarren neurketa, jubenil mailakoena, parekatuagoa izan zen. Ataundarrak faborito baziren ere 0 eta 4 galtzen hasi ziren, eta kosta egin zitzaien partidan sartzea. Handik aurrera, ordea, zazpina berdindu eta buelta ematen hasi ziren, beste bost tanto jarraian eginda. Azkenean, 22 eta 12 irabazi zuten.

Helduen mailan, azkenik, alde handiagoa ikusi zen bi taldeen artean, eta lizartzarrak gehiago izan ziren. 1-6 galtzen hasi ziren ataundarrak, eta ezin izan zioten alde horri bueltarik eman. Markagailua 5 eta 22 gelditu zen, Lizartzako bikotearen alde.

Joaneko partidak irabazita kanporaketa ondo bideratu du Ataunek. Asteburuan etxetik kanpo jokatuko dituzte itzuliko partidak.

Ataundarrek kanporaketa gaindituko balute Azpeitia eta Bergararen arteko irabazlearen aurka (Azpeitiak 3-0 irabazi zuen joanekoan) neurtu beharko dituzte indarrak finalaurrekoetan.

Palan, galdu eta berdindu

Palan ari diren bi taldeei dagokienez, Ordiziak Donostia hartu zuen etxean ostiralean; 0 eta 2 galdu dute, eta aldapa gora jarri zaie kanporaketa. Olaberriko taldeak final-laurdenetan hasi du ibilbidea, eta Errenteriarekin bana berdindu du herrian. Paletan errenteriarrak nagusitu ziren (30-35); Iker Arrietak eta Mikel Aranzegik jokatu zuten Olaberriaren izenean. Paleta motzean 40-19 irabazi dute Gari Arrieta-J.Luis Sarasolak. Ostiralean jokatuko dute Errenterian.