Goierriko Hitza

Agirreren logoa eta leloa aukeratu dituzte Oinezkoen Trenaren ikur gisa

Idiazabal

Guztira 25 lelo eta 17 logo aurkeztu dituzte lehiaketara; aukeratutako irudia duten azulejoak jarriko dituzte ibilbidean.

estitxu imaz

«Sormenean ustez borobilduta ikusi duzuna, besteak osotasunean jasotzeak poza dakar»

maider agirre ð- Logo eta leloaren egilea

Idiazabal

Maider Agirrek egindako logoa eta leloa aukeratu dituzte herri eskolan, eta ilusioz hartu du egileak erabakia.

e. imaz

Maider Agirrek (Beasain, 1974) egindako logoa eta leloa aukeratu dituzte Oinezkoen Trena ekimenaren identitate ikur gisara erabiltzeko. Ekimenari eta berak egindako lanari buruz hitz egin du Agirrek.

Nola animatu zinen lehiaketan parte hartzera?

Alaba zaharrena gelatik lehiaketaren deialdiarekin atera zen. Etxera joan aurretik irakurri egin nuen. Momentu honetan egoera pertsonal berezian nago. Bi haur izan ditut eta nire lanean etenaldi bat egin dut. Orain etenaldi hori bukatzen ari dela sumatzen dut. Gogoa eta beharra daukat lanean hasteko, baina hortik aparte esan oso etapa kreatiboan nagoela eta deialdia irakurri nuenean kreatibitate horrek bultzatu ninduen parte hartzera. Inpultso bat izan zen.

Oinezkoen Trena ekimenaren berririk ba al zenuen?

Bai. Eskolatik oso gertu bizi gara baina ekimena abian egon zen egunetan etxeko aldapa jaitsi eta Oinezkoen Trenean sartzen ginen, nahiz eta metro gutxi egin.

Zer iruditu zitzaizun ekimena?

Ekimena oso positiboa iruditu zitzaidan. Ohitura asko dugu barruraino sartuta, baina aste bakar batean ohitura horiek aldatzea oso zaila da. Horregatik dira garrantzitsuak horrelako ekimenak. Gurasoak garenok behar etiko eta moral bat dugu zentzu horretan eredu on bat emateko. Ezin ditugu zenbait gauza eskolaren edo irakasleen esku soilik utzi. Nik uste dut irakasleek eta gurasook batera lan egin behar dugula.

Zergatik logo eta lelo horiek?

Lehendabizi borobildu nuena leloa izan zen, ni formazioz filologoa bainaiz eta nire kreatibitatea hitzen bidez eta idatziz kanalizatzen baitut. Lehenengo burura etorri zitzaidan logoa ez zen izan justu hori, baina gauza batzuk kenduz eta beste batzuk jarriz horra iritsi nintzen. Eskolako ikasle zaharrenek zein gazteenek erraz barneratuko zuten lelo bat nahi nuen. Banekien hizkuntza konplexua ezin nuela erabili. Nahiko oinarrizkoa izan behar zuen, esateko eta gogoratzeko erraza baina aldi berean Oinezkoen Trena ekimenarekin oso lotuta egongo zena. Bestalde, gure barruak ikutzeko errimak indar handia izaten du eta beraz horren bila abiatu nintzen. Pisu handia eman nion errima izateari.

Eta logoa?

Guztiz intuitiboa da. Formak ere erabat primitiboak dira, garabato edo zirriborro batzuk. Hasieran saiatu nintzen tren bat marrazten. Marrazkilari on batek sei arrasto egin eta tren bat irudikatuko luke. Ni ez naiz marrazkilari ona eta hortik ezin nintzela abiatu konturatu nintzen. Orduan primitibotasuna bilatzera joan nintzen. Ahalik eta arrasto gutxien eginda tren bat sinbolizatuko zuen zerbait egitera jo nuen. Marrazkia norentzat izan behar den ere kontutan hartu behar da. Eta ikusten nuen primitobotasunera joz gero haur txikienek ere aulertuko zutela. Garabato beltza egin eta gero hor azpian dauden hankak bakarrik etorri ziren. Hankak egitasmoan parte hartzen duten guztien hankak dira. Denon ahalegina hanka horiek sinbolizatzen dute eta horregatik sartu dut kolorea ilusioaren hankak direlako.

Zure logo eta leloa aukeratu zituztela jakin zenuenean zer sentitu zenuen?

Enteratu nintzenean ilusio ikaragarria egin zidan. Sormen prozesuan ustez borobilduta ikusi duzun lana besteak bere osotasunean jaso izanak poz handia ematen du. Transmititu nahi zenuen hori besteari iritsi izanak osatzen du azkenean sormen prozesu hori.