Goierriko Hitza

Guardia Zibilak 32 urteko gizonezko bat -X.R.T.- atxilotu zuen atzo goizean Ordiziako Filipineta kaleko 17. zenbakian. «Internet bidez terrorismoa goratzea» eta «Espainiako bandera iraintzea» leporatzen diote. «Atxilotua interneteko foroetan sartzen zen, modu anonimoan, eta terrorismoaren biktimen kontrako irainak egiten zituen eta terroristen ekintzak justifikatzen zituen», zabaldu dute berri agentziek polizia iturriak aipatuz. Espainiako Auzitegi Nazionalak agindu du atxiloketa.

La Vanguardia egunkari kataluniarrak Vasco Press agentzia aipatuz zabaldu duenez, atxilotuak ustez abenduaren 1ean interneten mezuak utzi zituen, ETAk Capbretonen (Frantzia) bi guardia zibil hil eta gero. Iturri horien arabera, Espainiako Auzitegi Nazionalak ikerketa agindu zion Guardia Zibilari, «terrorismoa goraipatzen zuten zantzuak» ikusita.

Goizeko lehen orduan

Lekukoen arabera, kalez jantzitako guardia zibilek egin zuten atxiloketa Ordizian atzo, 07:30a aldera. Handik ordubetera Guardia Zibilaren hiru beribil azaldu ziren Filipineta kalera. Azoka eguna izanda, oinezko zein auto ugari pasatu zen atzo goizean kale horretatik, eta inguruko bizilagunek gertatutakoaz galdetzen zieten bertan zeuden kazetariei. Hiru orduz aritu ziren guardia zibilak atxilotuaren etxea miatzen, atxilotua bertan zela. 11:35 inguruan kalea itxi zuten, eta 11:50 aldera atxilotua etxetik atera zuten, burua estalita zuela. Bidea ireki zuten gero.

Albiste agentziek Guardia Zibilaren iturriak aipatuz esan dutenez, ordenagailu bat, informatika materiala eta zenbait agiri atera zituzten guardia zibilek atxilotuaren etxetik.