Goierriko Hitza

Gipuzkoako Auzitegiko Fiskaltzak lau urteko espetxe zigorra eskatu du Ordizia errugbi taldeko A.A.R. jokalariarentzat, ustez burukada bat emanda Bera Bera taldeko jokalari bati sudurra puskatzeagatik.

Gertaera 2006. urteko abenduaren 25ean izan zen Ordiziako errugbi zelaian, bi taldeen arteko derbian. Fisakalak aurkeztutako agirian dioenez Ordiziako taldeak lortutako entsegu baten ondorioz zelaian eztabaida piztu zen bi taldeetako jokalarien artean. Erantsi dutenez I.U.M. Bera Berako jokalaria liskarrean zeudenengana inguratu zen «giroa baretzera», eta orduan A.A.R. akusatuak burukada bat eman zion, sudurra hautsiz. Bera Berakoak zelaia utzi behar izan zuen zaurituta, eta Ordiziako jokalaria kanporatu egin zuen partidako epaileak. Bestalde, akusatuari bi hilabeteko kirol zigorra jarri zioten eta denbora horretan ezin izan zuen partidarik jokatu.

Bilera astelehenean

Ordiziako errugbi taldeko arduradunek atzo jakinarazi zutenez datorren astelehenerako bilera deitu dute Euskal Federazioko ordezkariekin, Bera Bera eta Ordiziako taldeko arduradunekin eta gertaerekin lotuta dauden bi jokalariekin. Ordiziako taldetik esan dutenez, «gure helburua da bilera horretan alde denak adostasun batera iristea eta modu horretara konpondu ahal izatea hau dena. Asmo horrekin joango gara asteleheneneko bilerara».