Goierriko Hitza

Legorretako Udalak Abiadura Handiko Trenaren inguruan inkesta bat egingo du datozen egunetan, herritarren iritzia ezagutzeko asmoz. Hiru adin multzotako 60 bat herritarri egingo dizkiete galderak.

2007ko hauteskundeen ondoren, udal berria osatu zenean, Abiadura Handiko Trenaren inguruan informazioa eta eztabaida bultzatzeko batzorde bat sortu zen Legorretan. Batzorde hartatik etorri da inkesta egiteko proposamena, eta datozen egunetan hasiko dira galdeketak.

Zozketa bidez 60 herritar aukeratu dituzte. Hiru adin tartetan banatu dituzte denak; 18-35 urte artekoak, 36-55, eta 56 urtetik gorakoak. Inkesta egin eta emaitzak eta ondorioak ateratzeko ardura Euskal Herriko Unibertsitateko zenbait irakaslek hartuko dute euren gain.

Hiru kilometro eta bi zubi

AHTren azpiegiturak 3.200 metroko ibilbidea egingo luke Legorretan barrena; horietatik 2.900 metro lurpean egingo ditu, tuneletan barrena. Zubina errekaren gainean 144 metroko zubia izango luke, eta Ugaran ibaiaren gainean 382 metroko beste bat egitea aurreikusten da. Bestalde, Alliri eta Aizpea harrobien inguruan «eraikitze gune bat» egingo dute. Eusko Jaurlaritzako Garraio Sailetik azaldu dutenez, «behin lanak bukatutakoan harrobiak estali eta birgaitu» egingo dituzte.

Lehendik ere gai horren inguruan Eusko Jaurlaritzak «informazioa ezkutatu eta eztabaida galarazi» duela salatu izan du Legorretako Udalak, eta «informazio egiazkoa eta objektiboa» eskatu dute.