Goierriko Hitza

Ordizia ðð Baionak irabazi zuen atzo Haurugby nazioarteko torneoa; aurten, Trevijanon ez baizik Altamirako zelaian egin den laugarren txapelketan. Jokalariek odol beroa erakutsi zuten Ordizian. Bukaeran paella-jana izan zen.

Gaztetasunak ematen duen adorearekin sutsu aritu ziren errugbilariak Ordizian atzo, Haurugby torneoan, norbere kamisetaren koloreak defendituz. Onena Baiona izan zen eta Ordizia laugarren postuan gelditu zen hamar talderen artean.

Bi minutu iraun zuen goizeko patida bakoitzak. Denbora aldetik neurketa motzak izan ziren, talde guztiek elkarren aurka jokatzeko aukera izan zezaten. Eguraldia lagun, goizean giro bikaina izan zuten baina arratsalderako eguraldia goibeldu eta euri zaparrada artean jarraitu behar izan zuten txapelketarekin.

Atzoko Haurugby 2008 torneoa Ordiziako Errugbi Elkarteak antolatu zuen, aurten laugarren urtez eta Euskal Herriko eta Euskal Herriaz kanpoko haur-eskoletako hamar taldek parte hartu zuten. Bi multzotan banatuta aritu ziren honako talde hauek: Baionako Avyron, R.C. Santander, Gernika R.T., Bearnoko Bal eta USEP taldeak, Getxo R.T., Hendaiako Stade, Donibane Garaziko Nafarroa 1 eta Nafarroa 2 taldeak, eta Ordizia Rugby. Goizean sailkapen faseko partidak jokatu zituzten eta arratsaldean erabaki zen torneoa.

Hiru sari

Talde bakoitzeko lehenengo bi sailkatuek Ordizia Rugby Saria jokatu zuten, bigarren sailkatuek Hagapeko Saria, eta hirugarrenek Ordiziako Udala Saria.

Torneoko sari nagusia Baionako Avironentzat izan zen, sailkapenean lehenen postuan bukatu zuelako. Bigarren, Hendaia geratu zen, hirugarren Usep eta Ordizia laugarren. Horrenbestez, Hagapeko saria Hendaiarentzat izan zen eta Ordiziako Udalak ematen duena Usep-ek eskuratu zuen. Jokalari onenaren saria, berriz, Hendaia taldeko Joanesi eman zioten.

Antolakuntza lanetan ibili den Ordizia Errugbi Elkarteko Juanma Aldanondo, gustura agertu zen torneoarekin. Ordiziak lortutako laugarren postuarekin ere pozik zegoen, «nahiz eta hirugarren postua esku-eskura izan dugun». Paella-jana egin zuten bukaeran.

Bestalde, Ordiziako errugbilariek gaur Donostian Euskadiko Txapelketa jokatuko dute, Bizkaiko eta Arabako txapeldunen aurka.