Goierriko Hitza

Gipuzkoako eskolarteko bertsolari gazteen XXVIII. txapelketako finala jokatu zen herenegun, Irurako pilotalekuan. Goierriko bertsolarien ordezkaritzarik ez zen falta izan finalean. Txikien mailan, Ordiziako Gemma Urteagak eta Zegamako Joanes Etxaidek Asteasuko Haritz Mujika eta Lasarteko Maddi Labakarekin osatu zuten taldeak kantatu zuen, batetik, eta baita Zumarraga-Urretxuko Maialen Akizu, Ane Agirre eta Mirari Arratibelek ere. Handien mailan, bestetik, Ainhoa Mujika beasaindarrak eta Endika Igartzabal gabiriarrak kantatu zuten.

Txikien mailan, saio dotorea osatu ostean, Goierri-Asteasuko taldea izan zen garaile. Benetan txukun aritu ziren taldeko lau bertsolariak, eta beste hiru taldeek ere saio txukuna osatu zuten arren, beraiek izan ziren nagusi. Urte honetan zehar heldutasun handia lortu dute Gemmak eta Joanesek eta bertso apartak kantatzeko gai izatera heldu dira, Aitor Sarriegi euren irakaslearen eskutik. Maila horren adibide, Joanesek lau oinak emanda bota zuen bertsoa eta Gemmak gaiari botatakoa. Honela kantatu zuen Joanesek: «Atzo goizean nuen / mateko esamina // herenegun gauean / ze buruko mina // ezin det gehio pentsau / sentitzet ezina // ai gauetik goizera / sendauko bagina». Gemmak, bere partetik, honoko bertsoa kantatu zuen, «apaizak elizako paretan pilotan jokatzea galerazi dizue» gaia aintzat hartuz: «Frontoira joan eta jolasten / hasi gerade gu bela // baina apaiza hor etorri da / ezin zitekeen bestela // eliz atarin jolasten degu / ta ze momentu krudela // harroputz bat da hor hasi zaigu / berea balitz bezela // ta gero berriz esaten dute / herria denona dela». Bertso ikaragarriak, zorionak Joanes eta Gemma!

Lan txukuna

Zumarraga-Urretxuko taldeak ere oso lan txukuna egin zuen. Maialen Akizu, Ane Agirre eta Mirari Arratibel izan ziren taldeko ordezkari eta Zumarraga-Urretxutik joandako lagun eta zale tropela gustura geratu zen eurek egindako lanarekin. Maialen eta Anek kantatu zuten lehendabizi, 4 oinak emanda. Maialenek bere maila agierian utzi zuen eta Mirarik, inongo debutari konplejurik gabe, bertso ederra kantatu zuen, datozen urteetan eman dezakeenaren aurrerapen modura. Honela kantatu zuen Maialenek: «Nola eman genuen / oholtzara pausoa // nahiz hemengo giroa / ez degun gozoa // egin nahi det saio bat / eder ta osoa // zuen aurren kantatuz / kristoren bertsoa». Mirarik, berriz, honakoa bota zuen: «Finalera iristeko / eman deu pausoa // ta aprobetxau beharko / momentu gozoa // orain bota beharko / hementxe bertsoa // nahiz lehen aldia izan / botakoet osoa». Jarraian, Andoni Egaña gaijartzaileak ondorengo gaia jarri zien Maialen eta Aneri: zuen jostailu kuttuna puskatu dizue anaia txikiak. Maialenek, 6 puntukoan ausart, bertso eder hau kantatu zuen: «Jostailutxo bat banuen / txikitatik betirako // pozik nengoen berekin / jolasten nuen galako // tren txikia ta ederra / oso bizkorra zalako // baina bi urteko anaiak / gaurkon eman dio planto // ez du atzera bueltarik / baina gaur esan beharko // ez dela hori egiten / Josu hurrengo baterako». Paregabea. Anek ere, ez zuen bertso makala bota, horratio: «Nola gaurkoan ahizpa txikiai / egin diodan ziria // nere panpina puskatua du / hori da gaurko egia // atera dio panpintxoari / ezkerren zuen begia // baina nik zerbait egingo diot / nahiz den pertsona argia // bagitxoa ez baina bururik / gabe utziko diot Barbia!». Zorionak Zumarraga-Urretxuko taldeari, txapelketa dotorea egin dute eta!