Goierriko Hitza

Bihar hasiko da Zumarraga-Urretxuko merkatarien elkarteak, Bi-tarteanek, antolatutako Merkataritzaren VII. astea. Honen helburua, «batetik, Urretxu eta Zumarragako biztanleei urte guztian zehar herriko dendengan jarri duten konfiantza eskertzea da, zozketak eta herritarrentzako ekitaldiak antolatuz. Bestetik, Urretxu eta Zumarragako ohiko merkataritza bultzatzea» nahi dutela azaldu dute antolatzaileek.

Aste osoan zehar, Bi-Tarteaneko bazkide diren dendetan erostean, bezeroek zozketetan parte hatuko dute. 200 eurotako bost erosketa-bale eta bi pertsonentzat Asturias edo Kantabrian zortzi asteburu zozkatuko dira. Honez gain, bihar hitzaldi bat egongo da Sara Gonzalezen eskutik; eguerdiko 14:40etik 17:00era, Salmentarako motibazioa izenburupean, Urretxuko kultur etxean.

Asteburuko ekitaldiak

Asteburuari begira, ostiralean bostetan Irrintzi antzerki taldearen txotxongilo emanaldia izango da Areizaga-Kalebarren plazan, Zuktu Jaunaren Alfabetoa izenburupean. Seietan Les Enfants taldeak ikuskizun berezia egingo du kaleetan zehar, musika, antzerkia eta efektu bereziekin. Elkarteko kideek ere ospatuko dute merkataritza astea, besteak beste, ostiralean afaria eginaz. Bukatzeko, larunbatean, ipuin kontaketa eta haurrentzako tailerrak izango dira.